Osan Insentivu Ba Delegadu Suku Ki’ik Liu

0
91
Konsultasaun Programa Sétimu Governu Konstitusionál iha Parókia Santo António Manatuto, sesta (16/2). Imajen Ajénsia Tatoli/Xisto Freitas).

MANATUTU, (TATOLI) – Delegadu suku sira preokupa ba osan insentivu tanba Governu oferese ba sira ho montante dollar 45 kada fulan neen.

Delegadu suku hosi suku sira ne’ebé iha Munisípiu Manatuto laran tomak hato’o preokupasaun ne’e liuhusi eventu konsultasaun programa Sétimu Governu Konstitusionál hosi Xefe Governu, Marí Alkatiri ho membru Governu sira iha salaun Parókia Santo António Manatutu, Munisípiu Manatutu, sesta (16/2).

Delegadu sira husu ba Governu atu haree kestaun ne’e, tanba insentivu refere labele responde ba sira nia nesesidade iha uma laran no iha biban ne’e sira mós preokupa katak osan Duo-Désimu ne’e kontinua prevé insentivu ka la’e.

Entretantu, Primeiru-Ministru, Marí Alkatiri, responde osan insentivu sei la para to’o Governu foun aprezenta nia programa no orsamentu jerál Estadu ba Parlamentu Nasionál.

“Ema balun soe propaganda iha baze katak orsamentu Duo-Désimu ne’e to’o iha marsu de’it. Ne’e la loos ida, tanba, en-prinsípiu, Duo-Désimu ne’e osan ne’ebé atu aloka ba fulan 12”, esplika.

Primeiru-Ministru mós rekuñese osan insentivu ba delegadu suku sira ne’e ki’ik duni, tanba ne’e Governu sei halo revizaun ba insentivu refere.

“Se ami maka kontinua lidera Oitavu Governu hafoin eleisaun antesipada, ami sei halo revizaun ba lei ne’ebé ko’alia kona-ba insentivu ba delegadu suku sira tanba osan $45,00 labele responde ba nesesidade sira”, promete.

Jornalista: Xisto Freitas

Editora: Rita Almeida

HUSIK IDA HATÁN