“Obrigadu Ba Governu Japaun”

0
189
Primeiru-Ministru, Marí Alkatiri, bainhira halo diskursu iha ámbitu serimónia hatur fatuk dahuluk ba projetu konstrusaun edifísiu foun FEST iha Hera, tersa (20/2). Foto GPM/Samuel Soares

DILI (TATOLI)–Primeiru Ministru (PM), Mari Alkatiri fó obrigadu barak ba Governu Japaun  tanba ho kooperasaun di’ak hodi harii edifísiu foun no ofisiálmente, ohin (20/02) lansa fatuk dahuluk ba projetu konstrusaun edifísiu foun Fakuldade Enjeñaria, Siénsia no Teknolojia (FEST) iha Hera.

“Ha’u fó obrigadu barak ba Governu Japaun  liuhosi Embaixadór Hiroshi Minami tanba iha kooperasaun di’ak tebes iha área enjeñaria,” Xefe governu ne’e hato’o iha lansamentu.

Tuir Alkatiri Lansamentu fatuk dahuluk ba konstrusaun edifísiu, ohin, importante tebes tanba atu lori siénsia no teknolojia ba oin liuhosi kooperasaun ne’ebé iha ona.

“Dalan ba dezenvolvimentu ita tenke loke, labele taka no diskrimina,” Alkatiri afirma.

Nia fó hanoin tan katak, uluk (ha’u) mai iha 2003 eh 2004 hanesa Xefe Governu atu inaugura reabilitasaun uma ne’ebé agora utilizada daudaun, iha tempu ne’ebá (ha’u) hateten katak iha (ha’u) nia oin ne’e futuru no halo tiha ona iha kotuk tenke sai pasadu.

Ohin (ha’u) fila mai hanesan mós Xefe Governu hodi asiste saida mak atu sai futuru signifika dinámika dezenvolvimentu mak ida ne’e.

“Tuir loloos Prezidente Repúblika, Lu-Olo tenke hola prezensa tanba nia almamater mak UNTL no ha’u la’e só apenas dezeja hodi dezenvolve UNTL,” Primeiru Ministru levanta tan.

Projetu konstrusaun edifísiu foun Fakuldade Enjeñaria, Siénsia no Teknolojia (FEST) iha Hera, fundu mai hosi Governu Japaun  montante $ 21 Milaun no obra ne’e sei ezekuta hosi kompañia Rinkai Nissan Construction Co, Ltd, Ogawa Seiki Co, Ltd sei hatama ekipamentu no sei hetan supervizaun hosi Construtium of Yamashita Sekkei Inc. And Intem Consultin, Inc.

Eskola FEST Konstrui Tuir Ambiente Japaun

(Jornalista : Zezito Silva)

(Editór : Manuel Pinto)

HUSIK IDA HATÁN