Nívio Prefere Revee Montante Multa Violasaun Lei Traballu

0
63
Sekretáriu Estadu Juventude no Traballu (SEJT), Nívio Leite Magalhães. Foto/Egas Cristóvão.

DILI, (TATOLI)—Sekretáriu Estadu Juventude no Traballu (SEJT), Nívio Leite Magalhães, prefere iha futuru hasa’e montante ba koima iha violasaun lei traballu, montante ne’ebé agora aplika mínimu dolar 230, no másimu 1.112 ne’e ki’ik ba violador sira tuir nia haree.

Ho hanoin ida ne’e Nivio sei aprezenta ba membru Governu foun ne’ebé mak sei troka nian atu hasa’e númeru multa ba sansaun.

“Ha’u iha hanoin ida atubele aprezenta mós ba membru Governu foun atu haree filafali kona-ba montante osan multa ninian. Tuir ha’u haree katak ida ne’e ki’ik tanba ne’e mak tenke hasa’e ba montante multa ne’ebé ami prevee ho punisaun grave ba sé de’it mak viola lei traballu 2012”, Nívio hatete iha Kaikoli, ohin.

Intensaun hasa’e koima nune’e ema ne’ebé mak halo irregularidade ne’e sei hanoin barak atu viola lei ne’e. Maibé Nivio sujere atu hasa’e montante, presiza estudu ida, labele naran foti de’it montante foun ida mai para atu troka, maibé halo análize ida kle’an bainhira análize hotu tiha mak foin bele altera ida ne’ebé antigu.

Aleinde ne’e SEJT hahú orienta ona Inspesaun Jerál Traballu para haree ida ne’e no tenke halo.

“Irregularidade ne’e iha hela, se mínimu 230 no másimu 1115 ne’e ladún todan no dala ruma ema balun halo tiha, maibé halo nafatin tanba selu 230 de’it ne’e lá vale buat ida. Tanba ne’e mak ita tenke hasa’e  bainhira, depois análize kle’an ida mak foin deside”.

Nune’e atu aumenta koima ne’e sei halo tanba labele halimar ho sé de’it ne’ebé viola ka lá respeita ou hakru’uk ba lei ne’ebé vigor.

Tuir artigu 99, alínea dahuluk lei traballu nian hatete violasaun ba norma sira ne’ebé hakerek iha lei bele hetan punisaun no ho sansaun asesória seluk, haree ba relevánsia husi interese ne’ebé viola, tuir determinasaun iha lejizlasaun espesífiku.

Jornalista : Maria Auxiliadora

(Editór : Manuel Pinto)

HUSIK IDA HATÁN