MPF Aprezenta Avaliasaun Impaktu Fiskál Hamenus Kiak no Dezigualdade

0
119
Foto dokumentasaun MPF.

DILI, (TATOLI) – Ministériu Planu no Finansa (MPF) hamutuk ho Kompromisu ho Kapitál Própriu (CEQ-sigla inglés) no Banku Asiátiku ba Dezenvolvimentu (ADB-sigla inglés) aprezenta rezultadu prelimináriu ba liña ministériu sira kona-ba avaliasaun impaktu fiskál atu hamenus kiak no dezigualdade.

Tuir nota komunikadu ne’ebé Tatoli asesu, avaliasaun ne’ebé hahú halo iha maiu 2017 ne’e hodi fó konsiderasaun sentrál lubun ne’ebé Timor-Leste presiza tetu atu haforsa impaktu polítika fiskál no meta ba ekuidade.

Liña ministériu ne’ebé envolve iha ezersísiu ne’e sei valida rezultadu simulasaun no haree utilidade avalisasaun bainhira identifika polítika atu hamenus kiak no ba reforma fiskál.

Nune’e mós liuhosi avaliasaun ne’e ajuda aumenta MPF nia abilidade atu halo polítika no enkoraza Governu tomak atu implementa Planu Estratéjiku Dezenvolvimentu Nasionál (PEDN) nia vizaun katak TL iha tinan 2030 sei sai nasaun ida ne’ebé tama ona iha rendimentu média aas no pobreza extrema eradikadu ka laiha ona.

Ministru Planu no Finansa, Rui Gomes, iha ninia diskursu iha seremónia horisehik hateten MPF iha responsabilidade atu guia liña ministériu sira hodi asegura sira nia programa no orsamentu proteje timoroan sira ne’ebé vulneravel liuhosi intervensaun fiskál ne’ebé efektivu no sustentável.

Parte seluk Diretór Nasionál ADB, Paolo Spantigati, observa katak importánsia husi governu nia programa iha saúde no edukasaun.

“Investe iha saúde no edukasaun ajuda hamenus kiak no garante katak ita hotu bele hateke ba futuru ne’ebé nabilan”, tenik.

Entretantu avaliasaun ne’e uza data MPF, Banku Mundiál foti husi peskiza nivel moris (Survey of Living Standards) iha tinan 2014, kobre uma kain hamutuk 5.916.

Finalmente peskiza ne’e fó sai rezultadu katak iha nível nasionál, TL nia kiak hetan redusaun husi pursentu 50,4 iha tinan 2007 tun ba pursentu 41,8 iha tinan 2014.

Jornalista: Julia Chatarina

Editora: Rita Almeida

HUSIK IDA HATÁN