Moeda Nasionál Sai Kestaun Iha Ajenda BSTL

0
174
Governadór BSTL, Abraão de Vasconcelos. Foto Antonio Goncalves

DILI, (TATOLI)- Governadór Banku Sentrál Timor-Leste (BSTL), Abraão de Vasconcelos, hatete atu Timor-Leste bele iha moeda nasionál sai hanesan kestaun ida iha ajenda BSTL nian tanba ida ne’e obrigasaun estatutáriu ne’ebé mak nia mandatu espesífiku atu haree asuntu ida ne’e hanesan no daudaun iha hela prosesu estudu nian.

“Mas Banku Sentrál la’ós hanesan lalais (terburu-buru) iha asuntu ida ne’e tanba kestaun ida moeda nasionál la’ós kestaun ida hanesan ita aprezenta estudu ida, ita debate lalais de’it pois ita hanoin dehan ita tenke iha osan rasik. La’ós tanba ita-nia viziñu ka ita-nia maluk balun iha rai-dook iha osan, ita mós tenke iha osan tanba iha sirkunstánsia hanesan ita-nia mezmu iha mundu agora, osan rasik ne’e lanesáriamente reprezenta identidade ka independénsia país ida ne’e nian”, Abraão hatete iha Novu Turizmu, ohin.

Hatutan nasaun barak iha mundu ne’ebé so’e tiha identidade ida ne’e hanesan Uniaun Europeia ne’ebé ezatamente sai ezemplu konkretu katak sira ne’ebé uluk iha moeda rasik sira so’e tiha no deside adota moeda komún ida.

“Ha’u lahatene Timor-Leste labele iha mas ita presiza fó rekursu sufisiente, halo estudu sufisiente, debate asuntu ida ne’e sufisiente para ita entende loos ita atu hakat bá iha diresaun ida ne’ebá karik saida mak ita atu enfrenta, ninia vantajen no devantajen ne’e saida, nia poténsia mak ida ne’ebé loos. Ita tenke entende buat sira hanesan ne’e tanba implikasaun ne’e la’ós hanesan ki’ikoan tanba nota iha país sira”.

Tanba ne’e importante tebes mak bainhira Timor-Leste iha moeda rasik, polítika saida mak introdús mak polítika monetária.

“Sirkunstánsia situasaun hanesan agora iha Timor-Leste, karik sé mak iha ne’e hanoin dehan polítika monetária atu efetivu, ne’e kestaun ida Banku Sentrál tau atensaun sériu tebes. Tanba ne’e mak prioritiza programa seluk hanesan modernizasaun ita-nia sistema pagamentu, mellora merkadu kréditu iha Timór tanba kestaun sira hanesan ne’e mak pré-kondisaun atu halo polítika monetáriu ida sai efetivu”.

Mezmu BSTL hetan mandatu husi Parlamentu Nasionál atu haree asuntu ida ne’e mas ne’e la’ós direitu eskluzivu ida ne’ebé mak hela de’it iha BSTL, maibé sidadaun hotu tenke rona desizaun hanesan ne’e afeta barak liu iha parte ida ne’ebé, grupu negósiu ka soseidade atu entende para estrutura aproximasaun la’o estruturadu.

Sobre moeda rasik BSTL introdús uluk ona koin sentavu ida, lima, sanulu, 25, 50 no 100. Iha Setembru 2017 fó sai tan ona sentavu 200 ne’ebé ekivale ho dolar rua.

(Jornalista : Maria Auxiliadora)

(Editór : Manuel Pinto)

HUSIK IDA HATÁN