MNEK Koordena ho MAE Destaka Estasaun Vota EA iha Rai Li’ur

0
436
Ministru Negósiu Estranjeiru no Kooperasaun, Aurelio Cristovão Guterres.

DÍLI, (TATOLI)-Ministériu Negósiu Estranjeiru no Kooperasaun (MNEK) koordena ho Ministériu Administrasaun no Estatál (MAE) liu-liu Sekretariadu Tékniku Administrasaun Estatál (STAE) monta estasaun vota ba Eleisaun Antisipada (EA) iha rai li’ur.

“Oras ne’e dadauk sira forma ona ekipa ida, semana oin sira destaka ona, ita sei halo, monta estasaun vota iha nasaun haat; Austrália, Portugal, Inglatera kobre mós Irlanda nomós Korea Sul,” informa ministru Aurélio Guterres iha MNEK, Praia dos Coqueiros, Tersa ne’e.

Objetivu hosi koordenasaun ne’e atu prepara hela atu sidadaun sira iha rai li’ur mós bele partisipa iha prosesu eleisaun ne’e.

“Bainhira iha fasilidade, ha’u sente sira mós bele partisipa iha eleisaun,” dehan governante ne’e bainhira jornalista sira tenta konfirma kona-ba dadus eleitór sira iha estranjeiru.

Hatán kona-bá sidadaun timoroan sira iha Indonézia, partisipa eleisaun ou lae, ministru ne’e esplika, sidadaun Timoroan ne’ebé hela iha Indonézia bele partisipa votasaun iha Timor-Leste.

“Ita haree to’ok será ke sira-nia kuadru legál permite para ita ba halo eleisaun iha rai laran ka lae?,” akresenta ministru Aurélio.

(Jornalista: Rafy Belo)

(Editór : Manuel Pinto)

HUSIK IDA HATÁN