MNEK Enkontru ho Liña Ministériál Refleta Adezaun TL ba ASEAN

0
172
Enkontru MNEK ho liña ministeriál sira. Foto: MNEK

DILI, (TATOLI) – Ministériu Negósiu Estranjeiru no Kooperasaun (MNEK) organiza enkontru internu ho liña ministeriál sira hodi halo reflesaun no atualiza informasaun kona-ba adezaun Timor-Leste (TL) ba organizasaun nasaun sira iha sudeste aziátika (ASEAN-sigla inglés).

Diretór Jerál Asuntu ASEAN, José Trindade Neves. Foto: MNEK

“Ami bolu malu mai hamutuk atu haree saida mak ami halo ona no seidauk halo i saida mak ami presiza halo hamutuk atu nune’e bele fasilita ita-nia adezaun ba ASEAN”, hatete diretór jerál asuntu ASEAN, José Trindade Neves Camões, iha marjen sorumutu internu iha MNEK, Praia dos Coqueiros, ohin.

Diretór ne’e akresenta Timor-Leste esforsu halo sensibilizasaun ba ministériu no autoridade relevante sira kona-ba organizasaun ne’e.

Ko’alia mós kona-ba prontidaun TL ba parseiru sira ligadu ho ASEAN no sira la iha objesaun. ASEAN kontinua halo avaliasaun ba TL tuir pilár ASEAN nian tolu hanesan polítika no seguransa, ekonomia no sosio-kulturál.

“Infelizmente, sira seidauk partilla ho ita rezultadu husi sira-nia assessment (avaliasaun) ne’e. Ita husu ba sira atu partilla ho ita rezultadu nune’e ita bele prepara aan di’ak liután para depois bele sai membru ASEAN iha tempu oin”, katak tan.

Nia hatutan enkontru internu ne’e nu’udar reflesaun, halo koordenasaun kona-ba saida mak bele halo iha nível tékniku depois bele lori mós ba nivel polítiku.

“Sira haree saida mak tékniku sira preokupa, saida mak polítiku sira presiza dehan ba ami, para depois nível tékniku, nível polítiku bele la’o hanesan para depois fasilita ita-nia adezaun ba tempu oin”, dehan diretór ne’e.

José Trindade Neves Camões mós rekoñese durante ne’e iha fallansu kona-ba komunikasaun no koordenasaun MNEK ho liña ministeriál sira no vise-versa. Tan ne’e, ba oin sei esforsu atu hadi’a di’ak liután liu-liu intensifika partisipasaun iha fórum ASEAN.

“Entaun ami presiza intensifika tan komunikasaun, koordenasaun atu enkontru ASEAN nian bele masimiza partisipasaun”.

Reprezentante TLAMP (Timor-Leste ASEAN Mobilization Plan), Edmund W. Sim, durante enkontru internu MNEK ho liña ministeriál aprezenta kona-ba mekanizmu no prosedura ne’ebé TL bele haree hodi fasilita adezaun lalais ba organizasaun Aziátika ne’e.

Aprezentasaun ne’e nia esplika kona-ba Memorandum of Foreign Trade (ASEAN) ne’ebé inklui Memorandum of Foreign Trade (WTO), Meetings with Line Ministries and Agencies (Enkontru liña ministeriál no ajénsia sira) no Draft of Mobilization Plan (Esbosu planu mobilizasaun).

Nia objetivu mak kria dokumentu moris (living document) ne’ebé bele kria rede entre ema sira (network of people), rekursu devotadu (devoted resources) no planu legál (legal plan).

Tuir mai, ministériu-estrutura espesifíka hanesan lei orgánika, pilár ASEAN nian; ekonomia, polítika no seguransa no sósiu-kulturál. Seluk mak kona-ba akordu no partisipasaun iha fórum ASEAN nian sira.

Edmund W. Sim mós esplika kona-ba pontu importante tolu TLAMP (Timor-Leste ASEAN Mobilization Plan) hanesan ema (pontu fokál, oráriu enkontru ba partisipante ASEAN nian), reskursu (verba no treinamentu) no kestaun legál sira (lejislasaun, planu serbisu no time-frame).

Jornalista: Rafy Belo

Editora: Rita Almeida

HUSIK IDA HATÁN