Misa Ne’e Asaun Morál La’ós Polítika

0
341
Xefe Bankada CNRT, Arão Noé. Foto Antonio Goncalves

DILI, (TATOLI) – Deputadu hosi bankada Kongresu Nasionál Rekonstrusaun Timor (CNRT-sigla portugés), Arão Noe, hatete misa ba ekipa negosiasaun delimitasaun fronteira marítima entre Timor-Leste ho Austrália ne’ebe akontese iha Jardin Eroi Metinaru foin lalais ne’e nu’udar asaun morál la’ós polítika.

“Asaun misa hanesan apoiu morál no orasaun nafatin ba ekipa negosiadór ne’ebé xefia hosi Negosiadór Prinsipál Fronteira Marítima, Kay Rala Xanana Gusmão, hodi fó forsa nafatin atu lori rezultadu di’ak mai Timor-Leste”, katak nia.

Hatutan tan saida mak Xefe Negosiadór husu ba veteranu sira. Se liuhosi partidu CNRT mak organiza ema dehan partidariza, se nia liuhosi veteranu sira mak ema dehan partizariza mós la loos ona.

Atu konsidera governu ka la’e, tuir lolos membru governu mak tenke hola inisiativa atu informa ba Primeiru-Ministru, Marí Alkatiri, tanba iha ne’eba membru governu ida.

“Asaun ne’e halo atu husu apoiu morál no orasaun hodi hetan rezultadu di’ak ba Timor-Leste”, katak tan.

Diskriminasaun ba governu la iha kuandu liuhosi veteranu tanba membru governu ne’ebé iha ekipa negosiadór mak bele informa ba Xefe Governu, Mari Alkatiri, maibé fiar katak membru governu informa nafatin.

Mezmu Xefe Negosiadór, Kay Rala Xanana Gusmão, la hato’o direta maibé asaun misa eh reza hanesan asaun morál la’ós asaun polítika no la’ós asaun governasaun ida atu governu obriga ema hotu ba misa.

Misa ne’e konsiénsia ema ida-idak nian hanesan veteranu, juventude, hanesan sidadaun sente katak negosiasaun atu dada pipeline mai importante ba Timor-Leste, entaun mai reza hodi husu tulun eh apoiu maibé sente katak ne’e la importante lalika ba tuir.

Ne’e la’ós obrigatóriu, se governu mak husu karik entaun bele obriga sarani sira atu ba reza maibé ida ne’e oinsá mak ita fó apoiu moral liuhosi orasaun no rai lulik Timor-Leste nian.

Membru governu mak la partisipa misa dalaruma sira sente katak asaun ne’e ladun importante tanba la’o sira nia ema mak halo eh sira bele intrepreta Xefe Negosiadór mai hosi Prezidente CNRT.

Benefísiu saida de’it mak mai hosi pipeline mai TL konsideradu ba povu tomak. Husu nafatin ba sidadaun hotu atu reza nafatin, husu rai lulik sira atu negosiasaun ne’ebé sei hotu iha 23 fevereiru bele lori rezultadu di’ak mai TL hodi dezenvolve ita nia rai tanba ita moris ho ita nia rikusoin rasik.

Xefe Bankada Partidu FRETILIN, Francisco Miranda Branco. Imajen Mídia Palásiu PR.

Entretantu tuir deputadu hosi bankada FRETILIN, Francisco Branco, Xefe Negosiadór, Kay Rala Xanana Gusmão, reprezenta Estadu tuir loloos Estadu mak organiza hodi halo misa hanesan lisan no fiar ida.

Membru Governu la marka prezensa iha misa solene tanba la iha karta konvite maibé liuhosi mídia de’it.

Maibé hanesan ema fiar, hotu-hotu tenke reza no harohan saida mak di’ak liu iha negosiasaun tanba asuntu pipeline mai Timor nu’udar interese Estadu.

Atu ba misa ne’e fiar ida, ema bele partisipa no ema labele ba tanba komunikasaun ho Maromak ne’e permanente no konstante iha fatin ne’ebé de’it.

“Se hakarak formaliza di’ak liu halo konvite pesoál atu membru governu bele marka prezensa”, katak tan Branco.

Jornalista: Zezito Silva

Editora: Rita Almeida

HUSIK IDA HATÁN