Ministru Turizmu Husu Apoiu UNWTO Atu Promove Nafatin Setór Privadu

0
93
Ministru Turizmu , Manuel Vong hasoru malu ho Sekretáriu Jerál Organizasaun Mundiál Turizmu, Zurab Pololikashvili, iha Madrid-España,19 fevereiru foin lalais ne’e. Foto/ MT.

DILI, (TATOLI) – Ministru Turizmu (MT), Manuel Vong, hasoru malu ona ho Sekretáriu Jerál Organizasaun Mundiál Turizmu (UNWTO-sigla iha inglés), Zurab Pololikashvili (iha Madrid-España, 19 fevereiru foin lalais ne’e) hodi husu apoiu ba Timor-Leste atu kontinua hametin parseria, promove nafatin setór privadu no dezenvolve modelu turizmu baze komunitária.

“Ita buka atu kria fundu ida ne’ebé mak ba duni fundu turizmu nian nune’e fasilita duni ita hotu atubele investe iha turizmu sein dependénsia ba fundu seluk ne’ebé mak halo ita dalabarak empresta osan husi banku, ita dada iis tanba nia juru aas tebes, no ha’u hein katak ida ne’e sei realiza”, katak Vong iha Sentru Konvensaun Dili, ohin.

Nune’e mós husu tulun atu UNWTO fó asisténsia kona-ba oinsá mak atu dezenvolve setór turizmu liga ho electronic tourism.

“Ita buka para promove ida ne’e hodi asegura katak turista sira tama, ita hatene duni sira ne’e turista ka la’ós. Tanba balun ho viza turista halo fali knaar seluk, entaun ida ne’e ba ita difisil tebes, atubele asegura ita presiza duni apoiu husi liur tanba ita laiha kondisaun”.

Aleinde ne’e ko’alia mós sobre lansamentu ba Visiting Timor-Leste 2020 ne’ebé mak sei halo promosaun ba ida ne’e atubele prepera-aan hosi simu vizita iha 2020 mai.

“Lansamentu programa ida ne’e ita hein katak preparasaun komesa husi agora ba to’o 2020 hodi nune’e to’o 2030 ita bele alkansa duni mehi boot iha ita-nia polítika katak turizmu bele balansia reseita husi petróleu nian hodi nune’e bele lori benefísiu ba ita hotu”.

Iha tinan hirak ikus ne’e, turizmu internasional Timor-Leste nian sa’e maka’as no hatudu kondisaun di’ak. Tuir barómetru ikus husi Organizasaun Mundiál Turizmu nian, iha 2017, ema estranjeiru ne’ebé tama iha aeroportu Dili aumenta to’o 16,5%, kontinua atinji rezultadu ne’ebé di’ak iha tinan 2016.

Jornalista: Maria Auxiliadora

Editora: Rita Almeida

HUSIK IDA HATÁN