Ministériu Haat Hetan Ajustamentu Iha DOT Fevereiru Nian

1
217
Vise-Ministra Planu no Finansa (MPF), Sara Lobo Brites, akompaña husi Diretór Jerál Orsamentu Estadu, Januario da Gama, halo konferénsia imprensa sobre DOT janeiru-fevereiru nian.

DILI (TATOLI)-Dotasaun Orsamentu Temporáriu (DOT) Fevereiru iha ajustamentu ba ministériu haat tanba iha razaun ne’ebé estipula iha dekretu Governu kona-ba DOT liuliu iha artigu 6 aplika exesaun ba ministériu sira hodi hetan pakote ruma atubele hatán nesesidade balun ne’ebé Governu no Estadu tenke responde.

Nune’e ajustamentu ba ministériu sira ne’e mak hanesan Ministériu Saúde (MS) iha alokasaun DOT millaun U$2.2 ba tratamentu rai-li’ur, millaun U$1.1. ba Ministériu Negósiu Estranjeiru no Kooperasaun (MNEK) ba arrendamentu iha rai-li’ur, millaun U$4 ba Servisu Autónomu, Medikamentu no Ekipamentu (SAMES) no millaun 7.6 ba Dotação para Todo o Governo (DTG) ne’ebé inklui preparativus ba eleisaun antesipada nian,  saláriu ba eis titulár sira no serbisu legál sira.

Diretór Jerál Orsamentu Estadu, Januario da Gama, hatete liga ba DOT iha parte DTG estipula despeza lubuk ida mak liña orsamentu jerál nian ne’ebé ita hanaran eleisaun antesipada, seluk mak despeza ba eis titulár sira, no MNEK atu hatán kona-ba despeza ba iha alugér propriedade estranjeiru,  aloka osan balun ba MS atu selu dívida ba tratamentu médiku iha rai-li’ur no ba SAMES aloka montante hotu ba akizisaun ai moruk nian.

“Sobre alokasaun orsamentu ba akizisaun ai moruk sai hanesan resposta ida ba intuisaun nian atu haree ba nesesidade komunidade nian tanba ne’e labele suspende nune’e aloka orsamentu ba ida ne’e”, katak Januario iha ámbitu distribui DOT fevereiru nian iha Aitarak-Laran, horisehik.

Hatutan sobre Eleisaun Antesipada nian (EA)  dezde Prezidente Repúblika anunsia, obrigatoriamente husi parte tékniku adianta ona montante balun iha Fevereiru atu hahú halo ona preparasaun.

“Tanba proposta balun tama tenke halo ona resensiamentu iha rai-liur, rai-laran entaun presiza kustu balun atu finansia, proposta balun ne’ebé hato’o (husi MAE) ninia pakote balun hetan ona resposta husi Dotasaun Orsamentu Temporáriu  iha fulan-fevereiru, montante jerál seidauk mas balun de’it ita kaptura ona iha ita-nia pakote tetu ida ne’e mas lasignifika aban ita ezekuta kedan tanba tenke mai ho breakdown despeza detalla ida tanba temi dehan adiantementu ba viajen lokál ba formasaun no seluk tan ho montante ida ne’e maibé seidauk iha breakdown ida ba kada munisípiu no nasionál hira”.

Diretór Nasionál Orsamentu Estadu, Salomão Yoaquim, hatete sobre DOT Janeiru no fevereiru nian sobre saláriu nia montante mantein no laiha mudansa.

“Mai fali iha bens e serviços iha diferensa sa’e ba millaun 11.5, nune’e mós iha parte balun tun millaun 1.3 ne’e atu informa katak prosesu ida ne’e iha kategoria rua akontese buat rua tanba ita-nia diferensa tetu ho nia distribuisaun iha jeneiru ita iha de’it millaun 13 entaun iha liña balun tenke suspende hodi fó fatin ba aplika artigu 6 ne’e ba ministériu haat”.

Tanba ne’e diferensa ba totál loloos mak millaun 10.2 atu ba MS millaun 2.2 ba tratamentu rai-liur, millaun 1.1 ba arendamentu, millaun 4 ba SAMES liuliu ba aimoruk no DTG iha millaun 7.6 ba saláriu eis tirulár sira ne’ebé lasufisiente, haree mós ba eleisaun antesipada no serbisu legál sira.

“Tanba ne’e maski iha millaun 14.9, maibé iha nia prosesu balun ita suspende ninia kustu, balun ita tenke responde”.

Vise-Ministra Planu no Finansas hateten iha duni exesaun ba ministériu haat tanba nesesidade ne’ebé mak tenke prioritiza embora iha esepsaun ba sira, maibé nia tetu agregadu ba totál pakote Fevereiru kumpre nafatin regra duodesimál nian pur tantu laliu husi tetu ne’ebé mak la aplika um doze avos ba DOT.

“Embora Prezidente Repúblika seidauk dekreta data eleisaun, maibé iha prosesu balun ne’ebé lori tempu naruk liuliu akizisaun ba ekipamentu no seluk tan entaun iha fevereiru nia laran ita tau ona montante balun ba para bele hahú ona preparativu sira ne’e”.

Montante millaun 7,6 iha DTG iha duodésimu fevereiru nian ne’e inklui  mós alokasaun orsamentu ba Sekretariadu Tékniku Administrasaun Eleitorál (STAE), PNTL no Komisaun Nasionál Eleisaun (CNE).

“Ami seidauk fó montante ne’ebé ezatu pur tantu ami simu ona proposta no provizoriamente ami iha dadus ne’ebé iha hela faze verifikasaun nia laran, maibé halo tiha verifikasaun tanba iha modalidade barak ba nia pagamentu sei konklui montante ida ne’ebé korretu”.

Jornalista : Maria Auxiliadora

(Editór : Manuel Pinto)

1 COMMENT

HUSIK IDA HATÁN