Merkadu La Iha, Garuda Kansela Operasaun

0
407
Vise-Ministru Obra Públika, Transporte no Telekomunikasaun, Inácio Morreira, organiza konferénsia imprensa. Foto TATOLI: Egas Cristovão

DILI (TATOLI) –Vise Ministru Obras Públika, Transporte no Komunikasaun, Inácio Moreira, informa Kompañia Garuda Indonézia la bele halo operasaun iha Timor-Leste tanba merkadu la iha.

Inácio dehan, governu iha opsaun voo ba Garuda  ne’e mak, opsaun voo Kupang-Dili no Dili-Darwin, maibé kompañia ne’e mak tenke trata rasik nia dokumentu.

“Garuda la semo tanba  merkadu laiha tanba  ne’e mak bainhira sira hakarak ita fó opsaun. Hau husu sei bele fó opsaun ba kompañia ne’e maibé sira mak tenke ba trata rasik”, Inácio Moreira tenik ba jornalista sira iha Faról, ohin.

Nia dehan bainhira iha Voo Dili-Darwin, bele minimiza kustu karun husi Dili-Darwin, maibé kompañia Garuda Indonézia rasik tenke trata tanba  governu Timor-Leste labele trata dokumentu legais husi Austrália lori kompañia ne’e nia naran.

Governu Timor-Leste disponivel fó fatin maibé depende ba kompañia rasik, importante liu mak operasaun husi operadór seluk labele iha interrupsaun.

Governante ne’e informa tan, sei halo kontaktu nafatin ho Garuda Indonézia hodi hare ba opsaun ne’ebé governu fó maibé depende mós ba Estadu, partikulár governu Austrália, iha mós opsaun seluk ne’ebé nia temi mak Denpasar-Dili-Darwin.

“Ita hein hotu-hotu depende ba negosiasaun, operadór, Estadu no destinu ne’ebé sira hakarak”, konklui.

Antes ne’e, Governu Timor-Leste tuir oráriu sei lansa operasaun aviaun Garuda Díli-Kupang no Kupang-Díli iha loron 15 Novembru 2017 maibé tanba  kestaun administrasaun entre Governu Timor-leste no Indonézia ne’ebé kompañia aéreu ne’e sidauk rezolve, voo pendente no sei halo lansamentu iha Janeiru 2018.

Maibé foin lais ne’e, Diretór Ezekutivu Servisu Rejistu no Verifikasaun Emprezariál (SERVE), Florêncio Sanches hatete tuir informasaun ne’ebé hetan rasik husi Prezidente Autoridade Aviasaun Sivil Timor-Leste (AASTL) katak kompañia aéreu Garuda Indonézia dada an atu hala’o atividade komersiál iha Timor-Leste.

Voo ho distinsaun hanesan (Díli-Kupang ba mai), hala’o ona husi kompañia aéreu Transnusa ne’ebé lansa voo dahuluk iha loron 15 Dezembru 2017 ho operasaun semana ida dala tolu iha segunda, kuarta no sesta ho konfigurasaun klase ekonomia no presu billete entre US$ 45 no 50. Aviaun komersiál Indonézia ne’e iha kadeira 70 ba pasajeiru.

(Jornalista: Julia Chatarina)

(Editór : Manuel Pinto)

HUSIK IDA HATÁN