Maria Teresinha-Signi Kompleta Meza Komisaun Permanente

0
233
Prezidente Parlamentu Nasional, Aniceto Guterres. Foto Antonio Goncalves

DILI (TATOLI) – Liuhosi reuniaun dahuluk Komisaun Permanente Parlamentu Nasionál (PN) iha salaun plenária ohin, finálmente Deputada Maria Teresinha husi bankada Kongresu Nasionál Ba Rekonstrusaun Timor-Leste (CNRT–sigla portugés) eleitu ba kargu Sekretária Komisaun Permanente no Deputada Signi Candrawati husi bankada Partidu Libertasaun Popular (PLP) eleitu hanesan Vise-Sekretária.

Liuhosi votu sekretu ba lista únika husi bankada opozisaun (CNRT, PLP no KHUNTO), eleisaun ba kargu rua ne’e pasa ho votu afavór 19, kontra 7 no abstensaun 3, husi 29 deputadu ne’ebé hola parte iha komisaun permanente.

Nune’e bazeia ba artigu 102 Konstituisaun RDTL, komisaun permanente sei funsiona durante períodu dissolvidu PN, iha intervalu sesaun no kazu seluk ne’ebé previstu iha konstituisaun. Komisaun ne’e sei prezide husi Prezidente PN, kompostu husi Vise Prezidente sira (na’in rua) no Deputadu indikadu husi partidu, ho respetiva reprezenta iha PN.

Rezolusaun ba komisaun permanente aprova membru 29 husi bankada parlamentár lima mak hanesan FRETILIN membru 10 iha komisaun permanente, CNRT 10, PLP 4, PD 3 no KHUNTO 2 nó mós Prezidente PN no Vise Prezidente na’in rua.

Deputadu sira ne’ebé partisipa iha komisaun permanente husi bankada FRETILIN mak Aniceto Guterres, Francisco Branco, Josefa Soares, Fausto Freitas, Lídia Martins, Antonino Bianco, Cidália Mesquita, David Mandate, Ilda Maria no Joaquim Dos Santos.

Husi bankada CNRT mak hanesan Arão Noe, Maria Teresinha, Dionísio Babo, Carmelita Moniz, Virginia Ana Belo, Adérito Hugo, Maria Fernanda Lay, Duarte Nunes, Brígida Correia, Eduardo Barreto.

Enkuantu husi bankada PLP iha komisaun permanente mak Fidelis Magalhães, Maria Angelina, Merício Juvenal no Signi Candrawati, husi bankada PD mak Julio Meta Malik, Maria Tereza Gusmão, no Luis Mendes, no ikus mai reprezentante husi bankada KHUNTO mak António Verdial no Armanda Berta.

Entretantu Kompeténsia komisaun permanente tuir artigu 102 Konstituisaun RDTL mak hanesan akompaña atividade Governu no Administrasaun, koordena atividade komisaun PN, promove konvokasaun PN bainhira nesesáriu, prepara no organiza sesaun PN nian, assentimentu dezlokasaun Prezidente Repúblika, dirije relasaun entre PN no Parlamentu sira no instituisaun análogas nasaun seluk, no autoriza deklarasaun estadu sítiu no estadu emerjénsia.

(Jornalista: Julia Chatarina)

(Editór : Manuel Pinto)

HUSIK IDA HATÁN