Lere Husu Governu Moderniza Forsa Armada

0
127
Parada militár iha ámbite komemorasaun transformasaun FALINTL ba F-FDTL ba dala 17 iha kuartél Fatuhada, ohin. Foto António Goncalves

DILI, (TATOLI) – Majór Jenerál FALINTIL-Forsa Defeza Timor-Leste (F-FDTL), Lere Anan Timur, husu ba governu atu moderniza no profesionaliza forsa armada tuir realidade Nasaun nian.

“Moderniza ita nia forsa armada, la’ós atu halo korelasaun forsa ho país sira potensiál maibé tuir ezijénsia realidade Timor-Leste nian”, hateten Lere Anan Timur bainhira halo diskursu iha ámbitu komemorasaun transformasaun FALINTIL ba F-FDTL ba dala 17 iha kuartél Fatuhada, ohin.

Tuir nia tenke hahú ona tanba komponente terestre, naval no Ministériu Defeza hanoin atu harii komponente aériu, entaun temi de’it seguransa tasi nian tenke iha meiu própriu atu asegura rikusoin iha tasi laran.

Enkuantu, Timor-Leste diversifika no loke luan kooperasaun téknika ho Nasaun sira seluk liliu ho viziñu hanesan Austrália, Indonézia, Malázia, Filipina, Japaun, Korea no Xina, nune’e tinan ne’e halo kolaborasaun ho nasaun 17 ho objetivu tulun hodi dezenvolve di’ak liután forsa armada iha área oioin, tantu iha formasaun rekursu umanu, treinu, troka informasaun, nune’e bele partisipa di’ak liután iha estabilidade rejiaun nian.

Alende ne’e problema hirak ne’ebé hasoru mak lian iha formasaun ba promosaun kuadru sira nian, governu presiza hanoin  oinsá lori militár sira hatene lian ne’ebé nesesáriu, liliu portugés. Espera katak Ministériu Defeza bele harii biblioteka dalen portugés iha Metinaru, nune’e bele fasilita militár sira aprende.

Jornalista: Zezito Silva

Editora: Rita Almeida

HUSIK IDA HATÁN