Lei Bandu Uza Atributu Rezisténsia Ba Interese Partidu

0
638
STAE iha kuarta, (11/4) halo enkontru ho partidu polítiku sira iha STAE Kaikoli, hodi ko'alia kona-ba papél iha eleisaun lejislativa. Foto TATOLI/Zezito Silva.

DILI (TATOLI)—Prezidente Komisaun Nasionál Eleisaun (CNE-sigla Portugés), Alcino Barris esplika tuir lei nú. 02/2016 kona-ba partidu polítiku, bandu partidu polítiku atu labele uza naran rezisténsia iha símbolu, atributu ba Partidu Polítiku sira liu-liu atu mosu iha bulletin votu.

“Bainhira CNE atu aprova bulletin votu, mais tarde atu konsidera bulletin ne’ebé uza atu vota ba, tenke haree buat ne’e han malu ho lei,” Alcino Barris esplika ba profisionál komunikasaun sosiál sira, iha Palásiu Governu, ohin.

Tanba lei bandu, CNE sei bolu partidu polítiku sira ne’ebé uza símbolu rezisténsia ba interese partidu atu retira ho volontariamente. Labele viola lei tanba ema hotu hatene katak Timor-Leste ne’e estadu direitu no estadu demokrátiku.

“Ita iha direitu maibé lei mak a cima de todos (aas liu buat hotu). Ita labele kontra momoos hela. Entaun, estadu direitu, estadu demokrátiku Repúblika Demokrátiku Timor-Leste maibé opta prinsípiu fundamentál estadu direitu, estadu demokrátiku. Ita tenke menjunjung tinggi (tane aas) prinsípiu sira ne’e,” Nia dehan tan.

Entretantu iha oportunidade hanesan Prezidente CNE la sita partidu ne’ebé de’it mak ohin loron sei uza símbolu rezisténsia ba interese.

“Prosesu ne’e ami labele halo konkluzaun, kontra la kontra ita haree uluk, dala ruma interpretasaun bele haboot liu tiha. Ita haree lai lei, nune’e halo ninia interpretasaun ka ninia re-ajustamentu labele kontradís,” Nia konklui.

(Jornalista: Rafy Belo)

(Editór : Manuel Pinto)

HUSIK IDA HATÁN