Labarik Barak Sei Hetan Violasaun

0
159
Joventude ida tur hein hela Bandeira Nasional no bandeirola Timor Leste nian neebe faan iha area estrada ibun kampung Alor Dili, 15 Maiu 2017. Aktividades joven no labarik sira faan Bandeira no bandeirola nee akontese wainhira ita atu komemora loron Nasional Timor Leste nian. Foto TATOLI

DILI (TATOLI) – Komisária ba Komisaun Direitu Labarik, Maria Barreto, husu ba Governu tenke fó atensaun ba protesaun labarik iha Timor-Leste, tanba labarik barak mak hetan violasaun fíziku, abuzu sexual, traballu infantíl, saúde labarik no edukasaun labarik.

Komisaria komisaun nasional ba direitu labarik. Maria Barreto.

“Situasaun ne’ebé labarik sira afeta iha Timor-Leste mak labarik barak hetan violasaun fíziku, abuzu sexual, traballu infantíl ne’ebé ema barak ladauk iha konxiénsia hodi uza labarik hodi hetan lukru, saúde ba labarik inklui edukasaun ba labarik,” Komisária, Maria Barreto ba jornalista hafoin hasoru malu ho Primeiru Ministru, Mari Alkatiri iha Palásiu Governu, Tersa (6/02).

Tuir nia, governu hanesan implementadór bele fó atensaun ba situasaun hirak ne’ebé labarik ho idade minor hasoru.

“Ha’u nia prezensa hasoru malu ho Xefe Governu, Mari Alkatiri hodi informa  kondisaun komisaun direitu labarik nian ne’ebé reflete ba situasaun labarik nian ne’ebé afetadu iha Timor-Leste.”

Atu rezolve violasaun hasoru labarik, daudaun ne’e komisaun direitu labarik hamutuk ho Sekretária Estadu Juventude no Traballu halo asaun Konjunta ho Polisia Nasionál Timor-Leste (PNTL) tun direita ba fatin ne’ebé mak labarik sira servisu ba.

Objetivu halo intervensaun atu fó hanoin ba públiku presiza hanoin oinsá mak atu fó protesaun ba labarik sira ne’ebé involve ba atividade ne’ebé seidauk merese atu halo eh seidauk tempu atu halo hosi labarik minoridade.

“PM, Mari Alkatiri apresia tebes ba servisu komisaun direitu labarik no kompromete atu próteze direitu labarik hosi risku eh tipu violénsia hirak ne’ebé afeta ba labarik,” Maria konta tuir.

Enkuantu nu’udar komisária, Maria dehan, seidauk iha dadus loloos ba violasaun labarik sira, maibé komisaun planu ona atu kria baze dadus ba asuntu labarik nian.

(Jornalista: Zezito Silva)

(Editór : Manuel Pinto)

HUSIK IDA HATÁN