Konsultóriu Jornalista Promove Simulasaun Debate ho Portugés

0
68
Jornalista no formadora konsultóriu língua ba jornalista sira hasai foto hamutuk ho vise-prezidente Institutu Camões, Gonçalo Teles Gomes. Foto Tatoli: António Gonçalves

DILI, (TATOLI) – Jornalista timoroan sira husi mídia imprensa no elektrónika ne’ebé frekuenta formasaun konsultóriu língua portugeza-nível B2 promove simulasaun debate ho lian portugés.Jornalista sira ne’e promovidu tanba kooperasaun SEKOMS (Sekretáriu Estadu Komunikasaun Sosiál) no Institutu Camões.

Simulasaun debate ne’ebé halo iha sentru formasaun Institutu Camões iha Kintál-boot ohin ne’e formandu ida-idak sai protagonista hodi halo aprezentasaun no debate kona-ba asuntu sosiál, ekonómia no edukasaun iha Timor-Leste. Simulasaun ne’e edukasaun mak sai asuntu debatidu liu.

Afonso do Rosário, formandu ida argumenta sistema edukativu iha TL atu bele la’o efetivu liutan presiza iha kolaborasaun entre entidade hotu hanesan governu, inan-aman, sosiedade sívil no entidade públiku no privada sira; konsensu.

“Taxa partisipasaun estudante sira aumenta iha ensinu sira iha Timor-Leste, tan ne’e presiza promove nafatin formasaun kontinua ba profesór sira iha língua nomós matéria espesífika ba profesór sira atu hanorin estudante sira hodi hetan kualidade edukasaun,” akresenta formandu ne’e.

Tuir dokumentu análize Ministériu Edukasaun (ME), iha ámbitu ba preparasaun kongresu Nasionál Edukasaun Datoluk ne’ebé hala’o tinan kotuk (hahú 3 to’o 5 maiu) iha salaun Lalini-Larigutu, CNE (Conselho Nacional das Eleições), Dili katak iha 2016 Timor-Leste iha eskola 1.715 kompara ho tinan létivu 2001 nian eskola hamutuk 943.

Enkuantu númeru estudante aumenta husi 238.6000 ba 391.6000 no profisionál edukasaun ka profesór sira husi 6.541 ba 13.948.

Xisto Ximenes, formandu ida mós akresenta formasaun importante ba profesór sira maibé importante liu mak oráriu formasaun labele dilemátiku ho oráriu ba aula, fasilita prosesu aprendizajen ba estudante sira.

“Profesór iha direitu no dever hanorin, estuda nomós aprende. Iha eskola balun, profesór sira balun hanorin iha dader nomós iha lorokraik, presiza haree preokupasaun profesór sira nian atu nune’e labele dilema ba profesór sira hodi tuir formasaun”, dehan formandu ne’e.

Formandu konsultóriu língua ba jornalista sira hatudu progresu balun no presiza nafatin promove atividade simulasaun sira hanesan ne’e.

“Parabéns. Imi presiza liberta aan; ko’alia loos, ko’alia sala, ko’alia. Ita kontinua nafatin hadi’a. Ha’u orgullu”, apresia formadora, Claúdia Taveira.

Tuir observasaun TATOLI, formandu sira entuziasmu no hatudu kurizidade durante simulasaun no simulasaun debate ne’e mós la’o dinámiku tebes.

Notísia relevante, http://www.tatoli.tl/2017/04/timor-leste-iha-estudante-sekundariu-hamutuk-64-400/

Jornalista: Rafy Belo

Editora: Rita Almeida

HUSIK IDA HATÁN