Kompozisaun Lista Deputadu AMP Ba EA

0
1196
Kay Rala Xanana Gusmão (Klaran) Taur Matan Ruak (los) ho José Naimori Bucar (Karuk)

DILI (TATOLI)—Aliansa Mudansa ba Progresu (AMP) ohin loro kraik ofisiálmente asina ona plataforma, polítiku, inklui kompozisaun lista deputadu ba Parlamentu Nasionál (PN) iha V lejizlatura ne’ebé sei hahoris hosi rezultadu Eleisaun Antisipada (EA). No iha tempu besik sei prodúz programa polítiku ba EA.

Kompozisaun lista AMP hanesan tuir mai ne’e; mantein deputadu na’in 35 ne’ebé mak iha ona antes ne’e kompostu partidu Kongresu Nasionál Rekonstrusaun Timor-Leste (CNRT-sigla Portugés), ho kadeira 22,  Partidu Libertasaun Popular (PLP) ho kadeira 8 no KHUNTO iha kadeira 5.

Restu hosi kadeira númeru 36 okupa hosi partidu CNRT hosi ema na’in 19, PLP, na’in 18 no KHUNTO na’in 18.

Prezidente Partidu Libertasaun Populár (PLP), Taur Matan Ruak.

“Dahuluk Aliansa Mudansa ba Progresu (AMP) iha ona kadeira 35 ne’ebé deside konsensu katak Partidu CNRT ho kadeira 22, PLP ho kadeira ualu no Khunto ho kadeira lima, enkuantu hosi kadeira 36 to’o 90, konta hosi 55, CNRT hamutuk 19, PLP 18, Khunto 18 ne’ebé sei submete ba Parlamentu Nasionál (PN),” Porta Vóz AMP, Taur Matan Ruak esplika ba Jornalista sira iha Sentru Konvensaun Dili (CCD-Sigla Portugés) hafoin deside formatura aliansa atu la’o hamutuk iha prosesu tomak eleisaun antesipada liuhosi Konferénsia Nasionál, Kinta (22/02).

Porta Vóz Aliansa Mudansa ba Progresu (AMP), Taur Matan Ruak deklara, AMP iha vontade determinasaun Aliansa Mudansa ba formasaun VIII Governu katak AMP manan, maibé oinsá mak atu sai vensedór presiza servisu hamutuk hodi determina mehi.

Ko’alia kona-ba programa AMP, eis-xefe estadu ne’e dehan, ohin asina de’it plataforma aliansa no seidauk ko’alia programa maibé hafoin ida ne’e komisaun sira sei prepara programa eleitorál iha tempu badak.

Tuir nia  partisipasaun iha eleisaun nu’udar obrigasaun polítika sívika katak nia iha direitu maibé iha mós devér atu vota, hanesan mós uluk ita vota ba ukun-an, entaun iha faze ne’e Timoroan hotu fó kontribuisaun hodi hari pás, estabilidade no dezenvolvimentu ekonómiku, nune’e presiza kontribuisaun ema hotu nian atu ezerse nia devér hodi vota inklui hirak ne’ebé la vota iha eleisaun lejizlativa iha 2017 maizumenus hamutuk 200.000.

“Iha Australia lei obriga tenke vota, maibé Timor-Leste lae, maibé sira tenke kumpre sira nia devér hodi kontribui ba festa demokrasia,” nia fó hanoin.

Hodi dehan tan, AMP deside formatura aliansa no iha nia kompromisu ida mak tenta no esforsu tomak atu kumpre rekizitu legál sira hodi rejista iha Tribunál Rekursu no sei pronúnsia ofisiálmente, enkuantu, responsabilidade la’ós Komisaun Nasionál Eleisaun (CNE-Sigla Portugés) nia liman kona-ba uza símbolu rezisténsia iha bulletin votu.

Francisco Kalbuady Lay, Taur Matan Ruak, no Naimori ka’er liman hamutuk iha konferénsia Nasionál PLP, Otél Novo Turizmu, Sábadu (11/11)

AMP ho Motto “Hamutuk Hametin Nasaun” ho objetivu prinsipál mak halo armonizasaun ba rezultadu konferénsia nasionál kada partidu nian, hosi partidu ida-idak hala’o nia konferénsia ne’ebé involve estrutura partidu iha nivel nasionál, munisípiu no postu administrativu hodi diskute no deside formatura aliansa atu la’o hamutuk iha prosesu eleisaun antesipada.

Armonizasaun polítika partidu aliansa no nia atributu úniku hakotu ho rezolusaun ne’ebé aprova ona hosi konferensista sira hosi partidu tolu ne’ebé involve iha AMP. Afirmasaun rezultadu rezolusaun kada partidu nian, ba konferénsia nasionál AMP hafoin konferénsia ne’e kada partidu hodi la’o hamutuk iha liña orientasaun polítika ida de’it ho naran AMP hodi hasoru eleisaun antesipada.

Halo aprovasaun ba logo/emblema no bandeira AMP nian nu’udar rekizitu própriu tuir lei eleisaun parlamentár.

Hafoin kompromisu polítiku liuhosi plataforma AMP ho objetivu atu hametin sistema demokrasia, formatura polítiku atu asegura governasaun foun ne’ebé forte no estavel ba períodu 2018-2030.

Entretantu, rezultadu hosi deklarasaun Konjunta ho aprovasaun unanimidade no hetan partisipasaun hosi delegadu hosi munisípiu no postu hotu inklui organizasaun masa partidu polítiku, observadór sira no konvidadu liu rihun atus ida.

(Jornalista : Zezito Silva)

(Editór : Manuel Pinto)

HUSIK IDA HATÁN