KM Aseita Importasaun DOC

0
206
Manu-oan ne’ebé foin moris ka Day Old Chick (DOC). Foto/Google.

DILI (TATOLI)—Hafoin halo analiza hosi ekipa tékniku Ministériu Agrikultura no Peskas (MAP), governu liuhosi reuniaun Konsellu Ministru (KM) foin lalais ne’e aseita importasaun manu oan foin moris (Day Old Chick-DOC),  mai Timor-Leste, maski antes ne’e bandu ona

Tuir Ministériu Agrikultura no Peska nia analiza tékniku nian, ba empreza sira iha Indonézia katak laiha ona perigu kona-ba gripe das aves (flu burung-iha lian Indonézia)  nune’e halo ona aprezentasaun iha Konsellu Ministru mak rekomenda atu VII Governu halo fali revizaun ba desizaun ne’ebé mak uluk aplika ba nasaun Indonézia hodi lá hatama manu no produtu manu mai Timor-Leste.

Sujere revee mós lei kuarentena Timor-Leste, no iha tempu hanesan Timor-Leste prepara kondisaun hodi hadi’ak Parent Stock atubele prodúz DOC (broiler no layer).

“Re importasaun produtu manu ba Indonézia nia vantajen mai Timor-Leste mak haree ba ekonomia nasaun nian,” Diretór Jerál Pekuária no Veterinária , Domingos Gusmão esplika iha nia servisu fatin Komoro, ohin.

Nia dehan, MAP rekomenda atu importa fali DOC (Ayam Potong) husi Indonézia nó mós produtu manu husi Indonézia signifika katak la’ós bandu ba Brazíl atu importa no buat serbisu sira ne’e la’o bá oin nafatin, negósiu livre ne’ebé nasaun sira ne’ebé importa naan-manu mai, produtu manu husi rai-li’ur mai ne’e sira livre nafatin para halo negósiu, maibé MAP halo analiza risku ne’e atu loke fali buat ne’ebé uluk Timor bandu atu Indonézia hatama.

“Reuniaun Konsellu Ministru ne’e aseita katak ami sei halo sistema rigorozu ida para halo fali akordu tékniku ida entre Indonézia ho Timor-Leste para oinsá mak bele importa DOC ne’e. Ita loke merkadu ba sira depois iha fronteira sira ne’e ita halo serbisu hamutuk,” Domingos esplika.

Hodi hatutan, Ministériu Agrikultura no Peska (MAP), liuhusi Diresaun Jerál Pekuária no Veterinária prepara hela dokumentu atu halo akordu tékniku hamutuk ho Indonézia atu nune’e komesa halo ona merkadu livre ba importasaun produtu manu no DOC.

“Iha tempu badak ami sei asina akordu ida para manu moris mós tama, ayam potong mós tama”, Domingos dehan.

Rekomendasaun atu hatama manu mai Timor-Leste sei haree mós ba kritériu tuir Organizasaun Saúde Mundiál ba Animál nian atu moras sira ne’ebé mak perigozu ba ema nia vida, husi nasaun sira ne’ebé afetadu ne’e bandu.

Ezemplu haree ba bio seguransa hanesan saúde umanu, ne’ebé Ministériu Agrikultura servisu hamutuk ho Ministériu Saúde, Komérsiu no Finansa, Defeza, Interiór para halo sistema rigorozu ida para aplika bio seguransa ida ne’ebé adekuadu para proteje ita-nia rai ne’e husi moras sira.

Entretantu rezultadu analiza ona relatóriu kona-ba levantamentu risku sira husi importasaun produtu manu husi Indonézia, foin lalais ne’e aprezenta hosi Ministru Estadu Agrikultura no Peska, Estanislau da Silva ba Konsellu Ministru.

Iha relatóriu ne’e avalia hikas fali kona-ba proibisaun, ne’ebé dekreta ona iha tinan 2008 liuhusi despaxu konjuntu Ministériu Defeza, Finansas, Ministériu Agrikultura no Peskas nian ba importasaun manu hakiak, manu-inan no produtu manu nian sira seluk ne’ebé seidauk prosesa ne’ebé mai husi nasaun sira iha ne’ebé deteta moras endémiku gripe manu sira-nian to’o hetan prova ne’ebé loloos katak moras sira ne’e laiha duni ona.

(Jornalista : Maria Auxiliadora)

(Editór : Manuel Pinto)

http://www.tatoli.tl/2018/02/map-propoin-doc-hosi-indonezia-tama-fali-mai-tl/

HUSIK IDA HATÁN