KI Husu Mídia Mantein Independénsia Editoriál

0
29
Prezidente Konsellu Imprensa, Virgilio Guterres.

DILI, (TATOLI) – Konsellu Imprensa (KI) husu ba órgaun komunikasaun sosiál sira atu mantein nafatin independénsia editoriál atu labele iha intervensaun polítika iha Eleisaun Antesipada (EA).

“Konsellu Imprensa (KI) hanoin katak importante tebes atu mídia sira bele konserva no mantein nafatin independénsia editoriál atu labele iha intervensaun polítika”, Prezidente KI, Virgilio Guterres, ba jornalista sira iha Fundasaun Oriente, sesta (16/2).

Normalmente hatudu kuandu iha eleisaun, polítiku sira balun koko uza mídia hodi sadere ba sira no dalaruma polìtiku sira utiliza mídia hodi sosa espasu.

“Ita presiza hamutuk hodi evita intervensaun polítika no ekonómika iha órgaun komunikasaun sosiál sira”, hatutan nia.

Tanba ne’e, independénsia editoriál iha mídia importante tebes, enkuantu komunikasaun entre ekipa redasaun, editór sira, jornalista sira ko korespondente sira pertinente atu kontribui no defende independénsia editoriál.

Nune’e, KI sujere ba mídia hotu liuhosi editór sira no xefe redasaun sira atu atensaun nafatin independénsia loloos no presiza nafatin kumpri kódigu konduta, kode étika jornalista no kódigu konduta ne’ebé uluk Sekretariadu Tékniku Administrasaun Eleitorál (STAE) katak oinsá jornalista sira bele halo kobertura iha sentru votasaun.

“Konsellu Imprensa (KI) sei la impoen eh kontrola redasaun sira maibé polítika redasaun kompeténsia tomak hosi konsellu redasaun”, katak.

Komunikasaun sosiál nu’udar komponente importante iha períodu kampaña tanba sai ponte komunikasaun ba povu no sira ne’ebé atu hetan poder.

KI sente nesesita duni hodi komunika xede redasaun sira, editór sira atu prepara-án no mantein integridade no independénsia redasaun nian hodi fó orientasaun ba jornalista sira atu halo kobertura nune’e informasaun bele balansu no kualidade.

Enkuantu, eleisaun antesipada ne’ebé atu frekuenta dadauk, KI realiza sorumutu ne’e ho editór no xefe redasaun sira mídia hotu nian atu fahe hanoin oinsá mak bele prepara-án hodi hasoru situasaun saida de’it mak redasaun sei hasoru iha festa demokrásia.

Jornalista: Zezito Silva

Editora: Rita Almeida

HUSIK IDA HATÁN