KFP-MNEK Organiza GJPRU Avalia Jestaun Rekursu Umanu TL

0
130
Prezidente Funsaun Públika, Faustino Cardoso. Foto KFP

DILI, (TATOLI) – Ministériu Negósiu Estranjeiru no Kooperasaun (MNEK) asumi responsabilidade téknika hodi organiza Fórum GJPRU (Grupu Jestór Profisionál Rekursu Umanu) hamutuk ho Komisaun Funsaun Públika (KFP) hodi avalia, koordena no komunika kona-ba jestaun rekursu umanu iha setór públiku nian. 

“Ne’e halo enkontru regulár, fulan-fulan, fulan ne’e (fevereiru) semak asumi responsabilidade tékniku atu koordena, Ministériu Negósiu Estranjeiru mak koordena ho tema Sentidu Sai Funsionáriu Públiku: Direitu no Dever atu Servi”, haktuir prezidente KFP, Faustino Cardoso, iha MNEK Praia dos Coqueiros iha marjen fórum ne’e ba jornalista sira, ohin.

Nia hatutan tema ne’ebé MNEK hili objetivu fahe hanoin, ideia, esperiénsia kona-ba jestaun rekursu umanu iha liña ministeriál nomós prinsípiu sira ne’ebé mak liga ho boa governasaun atu oinsá bele servi ho di’ak liután ba públiku.

“Husi forum ne’e ami bele atualiza ba sira polítika sira ne’ebé mak Komisaun Funsaun Públika hasai relativamente ho jestaun rekursu umanu iha nível ministériu sira”, akresenta prezidente KFP.

Kona-ba polítika sira ne’ebé KFP hala’o ona, nia katak polítika lubuk ida ona, entre polítika sira ne’e polítika iha ámbitu ba reforma iha funsaun públika, ajustamentu salariál nomós atribuisaun prémiu ba funsionáriu sira ne’ebé mak hala’o kna’ar “estremamente” kapas inklui hananu marsa KFP nian.

“Atu valoriza, motiva liuhusi hamosu marsa funsaun públika ne’ebé sira tenke kanta i sei kanta fulan-fulan iha eventu isar bandeira atu hodi motiva liutan funsionáriu públiku sira, atu hodi obriga sira kumprende mensajen sira liuhusi múzika ne’e”, dehan prezidente Faustino.

MNEK, reprezenta husi Diretór Jerál Asuntu Bilaterál, Isilio Coelho, halo aprezentasaun kona-ba: “O que ser funcionário público: O direito e dever de servir” ka oinsá sai funsionáriu públiku: Direitu no dever atu serbí.

Iha aprezentasaun ne’e nia halo komparasaun ho sistema administrativa sira iha Ázia komparasaun ho Europa nia, hodi halo ligasaun kontestu sitasaun administrasaun iha Timor-Leste.

Timor-Leste nian, diretór ne’e akresenta foka liu ba direitu no dever funsionáriu públiku nian ne’ebé hatuur iha estatutu KFP; ho baze lei nú. 5, 15 jullu 2015, alterasaun husi lei anteriór, lei nú. 8, 5 maiu 2008. Promulgadu husi Eis-prezidente Repúblika, José Ramos Horta, no públika iha Jornál Repúblika, 3 jullu 2009.

Iha lei ne’e, nia haree liu ba estatutu KFP, artigu 40 (Dever jerál) no 41 (Dever espesiál funsionáriu no ajente sira) ho 42 (proibisaun). Artigu 40 nia foka liu ba alinea P katak Prestar o melhor serviço à comunidade (Fó servisu ne’ebé di’ak liu ba komunidade sira) no artigu 41, alinea N katak Servir de exemplo para comunidade e respeitar os cidadãos sem discriminação (Servi nu’udar ezemplu ba komunidade no respeita sidadaun sira la ho diskriminasaun).

“Tuir ha’u-nia ponto de vista, ospitalidade mak sei preokupasaun, ha’u sente katak ita funsionáriu públiku ne’e tenke reitera fila fali katak ha’u sai funsionáriu públiku direitu servir, servir se? Servir populasaun, tan ne’e oinsá ho ha’u-nia ospitalidade?” nia kestiona hodi sujere atu funsionáriu sira bele haree kestaun ospitalidade hodi atende públiku.

Jornalista: Rafy Belo

Editora: Rita Almeida

HUSIK IDA HATÁN