Kamionete Tula Gozoel Baku Fila iha Karimbala

0
193
Kamioneta Turbo tula Gazoel hosi kompañia ETO ne’ebé baku fila iha Karimbala. Imajen Ajénsia Tatoli/Xisto Freitas.

MAUBARA (TATOLI)—Kamioneta Turbo tula gazoel ho litru 5000 baku fila iha subida Karimbala, Postu Administrativu Maubara, Munisípiu Liquiçá, segunda horsehik, tuku 15:30.

Kareta ho xapa matríkula 55.151 TL hosi kompañia Esperansa Timor Oan (ETO) ne’e baku fila tanba kareta Hilux ida taka dalan ba kamioneta refere iha subida Karimbala nia klaran, nune’e halo kamionete trava la biban no hakiduk fali ba kotuk.

Pedro Magno, kondutór Kamioneta, konta hela kronolojia akontesementu ba jornalista sira. Imajen Ajénsia Tatoli/Xisto Freitas.

Bainhira hakiduk ba kotuk, atu antisipa labele monu ba rai naruk (área estátua nian), kondutór dulas bolante ba foho lolon hodi soke foho refere, nune’e halo kamionete ne’e taka fila dala rua tui-tuir malu iha subida nia klaran.

Iha kamionete ne’e nia laran, iha ema na’in tolu (ajudante ida, sofer no sofer rezervadu na’in ida), maibé la rezulta kanek tanba bainhira kareta ne’e taka fila, sira na’in tolu salva an ho maneira hakuak malu metin iha kareta laran hodi evita monu sai ba liur.

Kamioneta ne’e hosi Dili atu suplly mina ba Atabae, Maliana. Entretantu, kareta Hilux hosi Maliana atu ba Dili. Iha akontesementu ne’e, mina litru 5000 fakar hotu kedas, kamioneta nia vidru parte oin, vidru liman loos no karuk rahun. Enkuantu, kareta Hilux ho kondisaun normál maibé halai lakon tiha.

Hafoin akontesementu, Pedro Magno nu’udar kondutór kontaktu kedas ba iha kompañia ETO no parte kompañia responde katak ne’e dezastre ema hotu la espera, maibé importante maka kondutór no ajudante labele hetan ajár. Iha parte kalan, kompañia haruka kedas kamioneta seluk ba hasai no dada kemioneta refere mai Dili.

(Jornalista: Xisto Freitas)

(Editór : Manuel Pinto)

HUSIK IDA HATÁN