KAK Investiga Ona Kazu Liu 20 Resin

0
335
Komisáriu Komisaun Anti Korrupsaun (KAK), Adérito António Pinto Tilman. Foto Espesiál.

DILI (TATOLI)—Komisáriu Komisaun Anti Korrupsaun (KAK), Adérito António Pinto Tilman, informa KAK sei aprezenta relatóriu anuál iha tempu besik iha uma fukun Parlamentu Nasionál (PN), iha relatoriu ne’e inklui mos ho kazu ne’ebé KAK investiga ona ne’e besik 20 resin.

“Kazu pur volta 20 e tal no kazu sira ne’e balun abuzu podér, pekulatu, partisipasaun ekonomia iha negósiu, kazu balun ne’ebé koneksu ba iha falsifikasaun dokumentu,” Adérito Tilman informa hafoin sensibiliza aspetu prevensaun korrupsaun ba kargu xefia iha Sekretáriu Estadu Juventude no Traballu (SEJT), Kaikoli, ohin.

Adérito subliña katak kona-ba kazu ne’ebé KAK investiga iha 2017, Estadu lakon besik tokon ida resin. Maibé KAK durante ne’e la fó sai iha públiku tanba lei la permite atu kazu ne’ebé KAK investiga tenke fó sai ba públiku.

“Ami hanesan órgaun polísia kriminál, ministériu públiku mak na’in ba asaun penál, ami rekomenda ba sira, sira mak halo prosesu ba iha Tribunál tanba ne’e mak ami labele fó sai iha televizaun ka jornál kazu hira mak ami investiga, envolve ema sé?”.

Maibé nia Aderito husu atu públiku bele akompaña iha tempu besik bainhira KAK aprezenta relatóriu anuál iha Parlamentu Nasionál.

Hatán kona-ba prezensa eis Ministra Finansas, Santina Viegas, ne’ebé foin daudaun ba presta deklarasaun iha KAK, Komisáriu hatete iha prosesu investigasaun segredu no labele fó sai.

(Jornalista : Maria Auxiliadora)

(Editór : Manuel Pinto)

HUSIK IDA HATÁN