Sujestaun Jornalista Ba Institutu Camões

0
104

DILI, (TATOLI)-Kontinuasaun programa konsultóriu língua portugeza ba jornalista sira, apoiu revizaun no materiál didátiku ba kursu komunikasaun sosiál ho jornalista sira nomós pedidu bolsa nu´udar sujestaun partisipante konsultóriu língua ba delegasaun Instituto Camões.

“Husu ba Institutu Camões atu kontinua nafatin ho projetu ida ne´e tanba alende ami, sei iha mós kolega sira barak,” propoen Eleteiro Sousa, partisipante konsultóriu ida ba Vise-Prezidente Camões, Gonçalo Teles Gomes,” iha sentru formasaun Camões, Kintál-boot, Díli, ohin.

Priscilia Fonseca, jornalista Rádiu no Televizaun Timor-Leste (RTTL) sujere ba Institutu Camões atu intensifika tan bolsu estudu ba timoroan sira, liuliu ba profisionál komunikasaun sosiál, husi media imprensa, eletrónika no online hodi reforsa kuñesimentu no hasa´e kapasidade.

“Ami hakarak tan bolsa, oferese husi Institutu Camões, hodi estuda iha Portugal,” sujere alumni kursu Komunikasaun Sosiál, Universidade Nasionál Timor Lorosa´e (UNTL) ne´e.

Hatan ba sujestasaun sira ne´e, Vise-prezidente Institutu Camões hateten katak Portugal kontinua apoia Timor-Leste, liuhusi kriasaun projetu oi-oin, konta ho apoiu governu Timor-Leste nian.

Ezemplu balun hanesan, Institutu Camões atribui ona bolsa interna ba estudante timoroan sira inklui oferese ona mós tinan-tinan, liuhusi kooperasaun embaixada Portugal hodi hasai kursu mestradu no doutoramentu iha Portugal.

“Bainhira buat hotu la´o di´ak formandu sira bele transmite fali koñesimentu ba kolega sira seluk. Portugal apoia; primeiru responsável mak governu Timor-Leste. Serbisu sira ne´e hamutuk,” akresenta delegasaun Institutu Camões ne´e.

Bainhira kestiona kona-ba jornalista na´in hira mak partisipa ona iha konsultóriu língua, profesora Cláudia Taveira, nu´udar formadora ida informa: “Jornalista na´in 123 mak tuir ona formasaun língua portugeza”.

Tuir relatóriu Konsellu Imprensa (KI), nú.1, maiu 2017, rezultadu levantamentu nasionál: Instituisaun media profisionál no rekursu jornalista iha Timor-Leste, totál jornalista sira iha país ne´e hamutuk na´in 459 (Feto 156, mane 303).

Nia mós informa katak sira la konsege fó apoiu halo revizaun kona-ba notísia ho lian portugés ba órgaun komunikasaun sosiál sira hotu iha Timor-Leste maibé konsege de´it fó apoiu ba media balun ho maneira “husi dook” tanba kestaun tempu no distánsia.

Kona-ba difikuldade partisipante konsultóriu língua portugeza, iha nível B2, profesora Cláudia konsidera kumprensaun orál sei sai problema no partisipante sira mós rekuñese situasaun ida ne´e.

Maske nune´e, tuir profesora Cláudia katak iha avansu balun. “Problema iha ne´e (turma B2) mak sira iha abilidade hakerek ho portugéz maibé sira la rona portugéz barak. Ida ne´e mak problema. Maibé, iha avansu boot iha última avaliasaun,” nia  avalia.

Entretantu hafoin delegasaun Institutu Camões sorumutu ho formandu konsultóriu língua portugeza ho formadora sira, delegasaun mós organiza enkontru badak ida ho formadora sira bainhira hasai foto ofisiál hamutuk.

Tuir informasaun, ekipa delegasaun ne´e, durante iha Timor-Leste, vizita mós  projetu kooperasaun oi-oin ho entidade timoroan sira hanesan, Quinta de Portugal iha Aileu, no iha kapitál Díli, ba vizita eskola ida ne´ebé mak apoiu husi Projetu Formar Mais (Formar+).

Nune´e mós eskola portugeza, Rui Cinnaty inklui prevé mós sorumutu balun ho lider Ministru Negósiu Estranjeiru no Kooperasaun nomós Ministériu edukasaun. Vizita projetu kooperasaun ne´e sei termina iha 28 fevereiru, aban.

Notísia relevante, http://www.tatoli.tl/2017/12/2016-2017-camoes-fo-bolsa-estudu-30-ba-timoroan/

(Jornalista: Rafy Belo)

(Editór : Manuel Pinto)

HUSIK IDA HATÁN