IJE Rejista Kazu Má Administrasaun Aas iha 2017

0
111
Inspetór Jerál Estadu, Francisco de Carvalho.

DILI, (TATOLI) – Inspesaun Jerál Estadu (IJE) rejista kazu hamutuk 18 iha 2017 ne’ebé iha relasaun ho pratika má administrasaun no indikasaun ba korupsaun ne’ebé akontese iha instituisaun Estadu sira.

ʺBarak liu maka má administrasaun no jestaun, uitoan de’it maka iha indikasaun krime ba korupsaunʺ, dehan Inspetór Jerál Estadu, Francisco de Carvalho, ba Tatoli iha Lecidere, kinta ne’e.

Hosi kazu ne’ebé iha indikasaun ba korupsaun, nia parte haruka ona ba Ministériu Públiku no Komisaun Anti Korupsaun hodi prosesa.

Enkuantu, ba kazu pratika má administrasaun haruka ba Primeiru-Ministru no superior hosi  ministériu relevante hodi foti sansaun.

Tinan ne’e IJE hahú halo investigasaun ba kazu balun ne’ebé iha relasaun ho pratika má administrasaun no seluktán.

IJE hanesan órgaun kontrolu internu Estadu hodi hala’o kna’ar importante tolu hanesan, auditóriu, inspesaun no investigasaun. Alende ne’e hala’o mós papél hodi desimina  informasaun ba  funsionáriu Estadu kona-ba governasaun di’ak hodi prevene prátika má administrasaun no korupsaun.

Programa sensibilizasaun informasaun ne’e IJE implementa hamutuk ho KAK, Provedoria Direitu Umanu no Justisa hahú tinan hirak kotuk no kontinua tinan ne’e.

Instituisasun Estadu ne’e estabelese ona durante tinan 18 ne’ebé tutela iha Gabinete Primeiru-Ministru nia okos, maibé problema rekursu umanu sai dezafiu hodi  apoiu prosesu auditóriu no funsionamentu institusaun ne’e.

ʺAmi ho funsionáriu permanente provolta 38, inklui cleaner, motorista, auditór sira kuazu rua nulu resin ne’e seidauk sufisiente hodi abranze iha teritóriuʺ, tenik.

Jornalista: Agapito dos Santos

Editora: Rita Almeida

HUSIK IDA HATÁN