Halo Auditoria, PM Dirije Karta Ba TR

0
124
Primeiru-Ministru, Marí Alkatiri. Foto António Goncalves.

DILI (TATOLI)—Primeiru Ministru, Marí Alkatiri informa, nia hakerek ona karta ba Prezidente ba Tribunál Kontas atuál Prezidente Tribunál Rekursu (TR), Deolindo dos Santos, atu halo auditoria setór haat hanesan Rejiaun Administrativu Espesiál Oe-Cusse Ambenu (RAEOA), tezouru (finansas), infraestrutura no turizmu.

“Horisehik ha’u hakerek ona karta ba Prezidente Tribunál ba Kontas atu halo auditoria ba RAEOA. Horisehik duni mós ha’u fó orden para atu kontrata ekipa auditóriu internasionál para halo auditoria ba tezouru, turizmu no infraestrutura,” Marí hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, kinta ne’e.

Xefe Governu esplika katak setór haat ne’e maka uluk no hafoin ne’e sei kontinua ba setór sira seluk atu públiku bele hatene lala’ok ezekusaun orsamentu jerál Estadu. “Sei halo uluk auditoria ba setór haat ne’e. Labele halo hotu dala ida. Se lae nunka mais hotu,” nia informa.

Marí haklaken auditoria sei hala’o iha semana ida ne’e nia laran no sei hahú hosi Rejiaun Administrativu Espesiál Oe-Cusse Ambenu.

(Jornalista: Xisto Freitas)

(Editór : Manuel Pinto)

HUSIK IDA HATÁN