Hakarak Hahán Lokál, Koko Reseita Cesar Gaio

0
225
Cesar, timoroan ne'ebe gosta promove hahán lokál. Foto/FB Dilicious Timor.

DILI, (TATOLI) – Dadaun ne’e kuaze ema lubun eskolla mak fast food (comida rápida) tanba lais no baratu duke tein rasik, satan prepara hahán lokál, Maubere nian.

Atu hatan ba sira ne’ebé hadomi produtu lokál no hakarak saudavel, koko reseita Cesar Trinito Freitas Gaio, tanba nia ho negósiu movel naran Food Truck (kamioneta ho hahán).

“Inísiu 2014 halo peskiza ida oinsá atu promove hahán Timór. Se ita loke restaurante de’it ema ladún bá entaun koko restaurante movel”, haktuir Baukau oan ne’e ba Tatoli iha kampu Sekretáriu Estadu Desportu ba Alta Kompetisaun (uluk SEDJ), Sionál foin lalais ne’e.

Nu’udar privadu ne’ebé gosta tein bainhira halo aventura hamutuk ho nia kolega sira kuandu sa’e no tun foho, fatin ne’ebé sira bá, mane ne’ebé moris iha rai Kelikai ne’e sempre tein no fornese hahán ba nia kolega sira, nune’e nia amigu sira ne’ebé la’o hamutuk rekomenda loke restaurante.

Food Truck.

Hahú iha loron 7 fulan-maiu 2015, retaurante movel loke ba dahuluk nian iha jardin 5 de Maiu, maibé iha limitasaun orsamentu no buat barak tanba iha momentu ne’e restaurant movel ida ne’e tenke gasta enerjia tanba hasa’e sasán hanesan bikan, kanuru, gás, sanan, depois hatún fali.

“Ami tein to’o kalan boot, ami hasa’e fali ba karreta depois tula fali bá uma, dalaruma sasán balun lakon. Iha esperiénsia sasán lakon dalaruma sana-matan monu hela, entaun ha’u komesa hanoin mobile kitchen (tein movel) ne’e karik ha’u bele dezenvolve tan”.

Nune’e halo fali tan peskiza ida bainhira sai manán-na’in ba kompetisaun Planu Negósiu Inovadora ne’ebé kada tinan realiza husi Institutu Apoiu ba Dezenvolvimentu Emprezariál (IADE) iha 2015 liuhusi nia ideia foun ne’e mak halo negósiu Dapur Movel ho prémiu osan natoon ne’ebé hetan bele ajuda hodi dezenvolve karreta, maibé momentu atu dezenvolve, mosu tan oportunidade ida husi embaixada Nova Zelándia atu aprende kona-ba Jestaun Ospitalidade entaun presiza aprende tan lai.

“Ha’u aprende buat barak entaun ha’u komesa estuda no peskiza tan fali, afinál food truck di’ak liu duké dapur movel, ita preokupadu liu. Ha’u komesa halo konseitu, ha’u to’o mai iha Timór kontaktu kolega timoroan, buka ema sira ne’ebé mak konstrui karreta ne’e no hetan rekomendasaun husi kolega timoroan”.

Tuir dezeñu ne’ebé halo ona maka Cesar ne’ebé hetan tulun husi timoroan sira ne’e modifika nia karreta movel ne’e sai food truck no operasaun karreta ne’e di’ak no iha laran gás tein nian, iha security awareness (seguransa hosi konsiénsia).

Entaun seguransa ba uza gás tein tau iha laran fire extinguisher (hamate ahi) ne’e oinsá ahi ruma mosu iha dapur laran bele hamate lalais, entaun iha karreta ne’e sistemátika tebes no uza de’it painel solar (enerjia hosi loro-matan) atu dada ahi.

“Entaun mobile food truck (hahán movel ho kamioneta) ami-nian ida agora ne’e sai hanesan inspirasaun ou motivasaun foun ba kolega klosan sira no ha’u rekomeda ba kolega klosan sira hakarak halo negósiu hakbesik án ba IADE tanba IADE fó oportunidade lubuk ida”.

Husi restaurante movel ba food truck (kamioneta ho hahan) ida ne’e iha dezafiu barak, maibé prinsipál mak distribuisaun ba produtu lokál laiha, nune’e tenta atu hetan distribuidór di’ak ho tomate ne’ebé iha kualidade, na’an-manu dalaruma kualidade laiha no tenke bá hola iha merkadu no lahatene moras ka la’e, maibé tanba hakarak promove produtu lokál tenke hola.

“Na’an karau iha ona butcher (profisionál ne’ebé oho animál/matadouro), maibé na’an-bibi nia fornesedór laiha, piór liu fahi karun liu entaun fahi no manu ami oho rasik, prosesu tomak ami halo hotu. Produtu ne’ebé ami fa’an iha restaurante no food truck no ami-nia catering (prepara hahán) porsentu 99 produtu lokál karik porsentu ida mak produtu importadu hanesan tua-siin”.

Maibé temperus lokál hotu, komesa husi masin, pimenta, ho razaun ida ne’e mak dezafiu kontinua ba presu hahán nian.

“Bainhira ami tau iha nível médiu sira dehan hahán karun liu. Presu entre dólar ida to’o hitu, kolega timoroan barak dehan hatún presu uitoan, ha’u dehan iha restaurante barak ne’e fó opsaun ba hahán ne’ebé ho presu dólar tolu mai kraik, ami fó opsaun foun labele hatún folin tanba ne’e ami labele manán”.

Mezmu komprende katak tende tuir konsumidór nia hakarak maibé mós hanesan timoroan iha responsabilidade atu hasae awareness of quality food (konsénsia hosi kualidade hahán), hahán ida halo kualidade, se hahán balun ne’ebé mak ho de’it jeladu, rai kleur ne’e folin oin seluk.

“Ami-nia hahán, na’an, modo tahan no buat hotu fresku entaun ami tenke fa’an ho folin hanesan ne’e, hanesan mós restaurante balun ne’ebé ho folin dólar hitu ba leten”, haktuir.

Konsumidór ba food truck (kamioneta ho hahán) agora ne’e husi ema rai-liur no lokál. Empreza Dilicious Timor ne’e mós prepara hahán ba edifísiu sira hanesan embaixada Amérika, fulan ida dalaida ba happy our (ami nian ksolok) nian, no semana ida dalaida tuir sira-nia enkomenda.

Estudante Universidade Dili ne’e hatete tenke buka negósiu rasik hodi kria oportunidade ba án rasik, tanba la’ós ema hotu tenke serbisu iha edifísiu sira no liga ba kampu traballu maski joven barak mak remata ona estudu labele hetan oportunidade atu serbisu tanba postu traballu limitadu.

“Joven sira ne’ebé hotu iha universidade, barak mak remata iha sekundária, saida mak sai hanesan dezafiu mak inan-aman balun kuda mentalidade iha labarik sira katak eskola hotu tenke serbisu iha edifísiu tanba inan-aman sira serbisu toos ne’ebé sira hakarak oan sira serbisu iha kantor (eskritóriu). Tuir ha’u nia hanoin ne’e konseitu sala. Tanba ha’u esperiénsia serbisu kantor tinan 10. Kantor ne’e di’ak mas atu kria ita-nia kreatividade, ita ida-idak mak buka ita-nia identidade tanba edifísiu ne’e ita hein instrusaun, maibé harii ita-nia mehi ne’e mak difísil”.

Nune’e Cesar buka nia identidade liuhusi tein no daudaun fó ona serbisu ba ema na’in-lima no iha hanoin atu hasa’e tan servisu nain nomós iha traballadór parte tempu husi estudante finalista balun hosi Universidade Nasionál Timor Lorosa’e, Universidade ba Pás no Universidade Dili ne’ebé halo atividade prepara hahán nian.

Nia hatutan menú husi empreza ki’ik ida ne’e mak hahán lokál enkaixa nafatin hahán hanesan akar loroloron no komesa dezenvole kulu ba croquete (boliñu ho forma kreme), halo trigu no dezenvolve neineik tanba presiza ekipa forte atu harii mehi ida ne’e.

“Ha’u ema ida ne’ebé iha paixaun aas kona-ba produtu lokál, ha’u lori akar tuir ha’u-nia án to’o Europa, kuandu ha’u hasoru kolega ha’u sempre tein akar. Bainhira ha’u bá Austrália ha’u sempre promove hahán Timór no ha’u vizita Wild Coffee Timor, ko’alia ho sira no agora ha’u lóbi hela sira para lori mana Carlota husi ETDA para enkaixa menú Timor ida rua iha sira-nia restaurante”.

Aleinde promove mós iha país Ázia bainhira vizita ba kolega sira no tein iha sira-nia uma.

“Iha Timór ha’u promove iha fatin barak, Baukau, Manatutu, ha’u tein to’o merkadu Taibesi no agora GMN fó oportunidade ha’u tein iha programa Sabor a Timor”.

Ko’alia kona-ba sabór Timór nian ne’e inklui hanesan ai-manas ai-leten. “Kuandu Timór tenke indéntiku, se ha’u temi lis-mean no mutin ne’e ema hotu uza, maibé ai-manas ai-leten karik iha Timór ema ida-rua mak uza, depois akar ne’e ha’u deskobre katak ema Índia, Srilanka, Indonézia-Papua no fatin balun hanesan Vietname, sira mós uza, maibé ladún”.

Ingrediente sira ne’ebé estrañu dezenvolve iha restaurante Dilicious Timor, ezemplu ba kulu ne’e halo peskiza to’o Zamaika tanba sira mak halo dezenvolvimentu hahán kulu barak, nune’e mós Samoa no Fiji.

“Entaun iha Dilicious Timor dezenvolve hahán sira ne’ebé ho baze Ázia nomós Pasífiku no identidade ita-nia hahú husi ne’ebá”.

Tanba gosta promove hahán lokál no gosta tein, Cesar hatete la’ós feto ka mane mak tenke tein maibé hanesan.

“Nu’udar mane ha’u tein, ha’u lasente moe, ha’u gosta halimar, dansa, gosta badiu. Buat ne’ebé mane halo, ha’u halo, buat ne’ebé feto halo ha’u mós halo signifika ha’u ema moris, ha’u hamlaha presiza tein entaun bainhira tein kolega sira rekomenda no ha’u sempre ajuda ema no hanorin. Hatudu imajen katak mane mós tein, ne’e para ema labele hatete katak Timór ne’e feto de’it mak tama dapur”.

Jornalista: Maria Auxiliadora

Editora: Rita Almeida

HUSIK IDA HATÁN