Governu Sei Aumenta Postu Resensiamentu Iha Irlanda Norte

0
244
Primeiru-Ministru, Marí Alkatiri, dada-lia ho ulun boot órgaun eleitorál sira iha Palásiu Governu, ohin. Foto António Goncalves

DILI, (TATOLI) – Diretór Jerál Sekretáriu Tékniku Administrasaun Eleitorál (STAE), Acilino Manuel Branco, hatete governu sei aumenta postu resensiamentu iha Irlanda Norte maibé asegura ho rezolusaun.

“Ohin iha ajenda Konsellu Ministru diskute kona-ba postu resensiamentu iha rai liur. Iha tinan kotuk iha ona nasaun neen no tuir informasaun atu loke tan iha Irlanda do Norte”, tenik Acilino ba jornalista sira iha Palásiu Governu, ohin.

 Eleisaun parlamentár ne’ebé akontese iha loron 22 jullu 2017, nasaun neen mak Austrália (Darwin, Sidney no Melbourne), Korea do Sul, Inglatera no Portugal.

Hodi dehan tuir lei kompeténsia ne’e atribui ba Ministériu Negósiu Estranjeiru no Kooperasaun (MNEK), nune’e sekuandu iha ona aprovasaun rezolusaun ne’e ekipa tékniku husi STAE, Komisaun Nasionál Eleisaun (CNE–sigla portugés) no MNEK sei desloka tempu badak ba nasaun sira ne’ebé fiksa ona liuhosi rezolusaun governu atu hahú halo resensiamentu.

Prezidente Repúblika, Francisco Guterres Lú Olo, dekreta loron ba eleisaun antesipada iha loron 12 fulan-maiu, órgaun eleitorál sei hahú ona resensiamentu iha teritóriu durante loron 30 nia laran konta husi loron fiksa eleisaun antesipada.

“Tuir lei ita sei públika lista finál antes ba eleisaun loron ne’e mak 12 abril entaun atendimentu sei hotu semana rua antes iha ne’eba tanba ita sei kontinua ho atividade sira seluk”, dehan tan.

Hatutan tan oras ne’e dadauk halo hela koordenasaun ho parte hothotu, liu-liu órgaun eleitorál hanesan CNE no STAE atu promove edukasaun sívika nune’e bele hetan partisipasaun másimu husi eleitór sira.

“Iha Irlanda do Norte mak hanesan sentru foun, tanba ne’e mak ita hein hela atu hetan aprovasaun iha rezolusaun governu nian, ha’u hanoin tékniku sira sei ajusta para halo deslokasaun no ita mós sei inisia resensiamentu iha ne’eba tanba iha futuru atu sai sentru votasaun ida iha eleisaun antesipada”, katak tan.

Tuir nia aktu atu prepara eleitór iha nasaun ida atribui ba MNEK no lori ba debate iha KM atu bele sai hanesan rezolusaun ida atu fiksa nasaun ne’ebé de’it mak sei estabelese postu resensiamentu no futuru sentru votasaun.

STAE hafoin iha rezolusaun ne’e sei ajusta nian planu sira atu bele kumpri desizaun ne’ebé mak iha.

Antes ne’e dadus resensiamentu to’o 21 dezembru mak eleitór 768,200 eleitór atualiza iha sistema baze dadus STAE nia no oras ne’e aktus ne’e kontinua hela no só bele públika loron 30 antes eleisaun.

Hodi haktuir iha rezolusaun uluk estabelese ona Irlanda Norte hanesan sentru ida maibé altura ne’eba labele implementa tanba kestaun tékniku.

“Kestaun tékniku mak la konsege realiza iha ne’eba maibé espera katak ho rezolusaun ne’e bele kontinua preve”, dehan tan.

Jornalista: Julia Chatarina

Editora: Rita Almeida

HUSIK IDA HATÁN