Governu Japaun Apoia 2.231 Bilaun Yen Ba Konstrusaun Edifísiu FEST

0
275
Embaixadór Japaun nian mai Timor-Leste, Hiroshi Minami, bainhira halo diskursu iha ámbitu serimónia hatur fatuk dahuluk ba projetu konstrusaun edifísiu foun FEST iha Hera, tersa (20/2). Foto GPM/Samuel Soares

HERA, (TATOLI) – Governu Japaun finansia projetu konstrusaun edifísiu foun ba Fakuldade Enjeñaria, Siénsia no Teknolojia (FEST) hosi Universidade Nasionál Timor-Leste (UNTL) ho osan 2.231 bilaun yen eh maizumenus millaun dolar amerikanu 21.

“Governu Japaun komete ona hodi suporta Governu Repúblika Demokrátika Timor-Leste (RDTL) ho orsamentu 2.231 bilaun yen ou maizumenus $21 milliaun hodi finansia ba projetu ne’e, enkuantu apoiu ne’e atu kontribui hodi melloria ambiente aprendizajen ba estudante sira no peskizadór universidade nian atu lori dezenvolvimentu indústria rekursu umanu sira iha Timor-Leste”, hatete embaixadór Japaun nian mai Timor-Leste, Hiroshi Minami, iha nia diskursu iha ámbitu serimónia hatur fatuk dahuluk ba projetu konstrusaun edifísiu foun FEST iha Hera, tersa (20/2).

Embaixadór Japaun nian mai Timor-Leste, Hiroshi Minami, bainhira tau masa iha lansamentu hatur fatuk dahuluk ba projetu konstrusaun edifísiu foun FEST iha Hera, tersa (20/2). Foto GPM/Samuel Soares

Iha serimónia ne’e, Hiroshi Minami hatutan Japaun ho FEST iha ona istória kleur dezde Nasaun ne’e hahú harii. “Ami komesa projetu dezlokasaun urjente ba FEST iha 2001 no haruka ona profesór sira hosi Japaun ba FEST no simu mós dosente hodi ba tuir treinamentu iha Japaun no fó ekipamentu ba UNTL dezde 2004”, katak nia.

Liuhosi apoiu hirak ne’e fiar katak FEST sai ona hanesan instituisaun avansadu ba peskiza no edukasaun universitáriu ho dosente hirak ne’ebé talentu no fiar tan katak FEST bele produz rekursu umanu sira ne’ebé bele kontribui ba Timor-Leste nia dezenvolvimentu.

FEST hosi UNTL lokaliza iha Hera, munisípiu Dili hanesan parte ida hosi UNTL nian “Planu Estratéjiku 2011-2020” ne’ebé atu trasnforma nia án sai hanesan instituisaun akadémika ho kredivél iha nivel no estandarte internasionál molok 2020, UNTL komesa halo ona planu dezlokalizasaun ba fakuldade sira hodi muda ba kampus Hera.

Timor-Leste kleur ona enkoraja dezenvolvimentu no melloria edukasaun universitáriu liuhosi programa bolsu estudu ba rai liur no hadi’a universidade iha rai laran, iha 2012 fakuldade ne’e aumenta númeru departamentu hosi haat ba lima maibé edifísiu la sufisiénte atu akomoda númeru estudante ne’ebé aumenta sa’e.

Ho sirkunstansia hirak ne’e Governu Timor-Leste no Governu Japaun asina nota ofisiál ida iha 2016 kona-ba kooperativa ajuda gratuita hodi dezenvolve edifísiu foun ba FEST hosi UNTL.

Entretantu, Rinkai Nissan Construction Co,Ltd mak sei implementa obra ne’e no Ogawa Seiki Co, Ltd mak sei suplai ekipamentu ba projetu ne’e no sei hetan supervizaun hosi Consortium of Yamashita Sekkei Inc. And Intem Consulting, Inc.

Enkuantu projetu ne’e inklui hotu parte konstrusaun hanesan salaun no laboratórium, nune’e salaun ne’ebé nesesáriu ba departamentu lima, salaun auditórium ba ema 400, biblioteka no ekipamentu materiál ba edukasaun no uza ba laboratórium, no projetu ne’e sei kompleta iha Jullu 2019.

Serimónia ne’e organiza hosi UNTL no hetan partisipasaun hosi embaizadór Japaun iha Timor-Leste, Hiroshi Minami, Xefe Governu, Marí Alkatiri, Membru Governu sira, Estudante sira UNTL no komunidade lokál sira.

Jornalista: Zezito Silva

Editora: Rita Almeida

HUSIK IDA HATÁN