iklan

NASIONÁL, INTERNASIONÁL, DILI

Governu Fasilita Resenseamentu Movel Ba Diaspora

Governu Fasilita Resenseamentu Movel Ba Diaspora

DILI (TATOLI)–Diretór Jerál Sekretáriu Tékniku Administrasaun Eleitorál (STAE), Acilino Manuel Branco, informa governu aseita ho ezijénsia atu halo atendimentu movel iha ámbitu resenseamentu ba konsentrasaun komunidade iha Korea Súl, Lizboa, Inglaterra hanesan iha Oxford no Reinu Unidu no Australia.

“STAE simu ona kontaktu hosi Ministériu Negósiu Estranjeiru no Kooperasaun (MNEK) atu governu liuhosi Ministériu Administrasaun Estatál (MAE) bele disponibilidade atu fasilita atendimentu movel ba konsentrasaun komunidade sira iha Diaspora,” Diretór Jerál informa ba Ajénsia Notísias “TATOLI” iha Kaikoli, ohin.

Maski nune’e, STAE sei haree hodi halo konsultasaun ho Ministériu Administrasaun Estatál (MAE) no Ministériu Finansa hodi disponibiliza atu fasilita atendimentu movel ba resenseamentu iha rai liu.

Atendimentu movél ne’e akontese tanba área jeográfika luan tebes hodi halo dezlokasaun, entaun presiza orsamentu atu fasilita liuhosi Governu Timor-Leste.

“Sekretáriu Tékniku Administrasaun Eleitorál (STAE) sei submete ba Estatál no Ministériu Finansa atu haree nune’e bele fasilita orsamentu ba prosesu atendimentu movel iha ámbitu resenseamentu no atualizasaun baze dadus iha rai li’ur,” nia dehan tan.

Enkuantu, atendimentu órgaun eleitorál la’o normál tanba governu aprova ona rezolusaun atu fiksa postu resenseamentu iha rai li’ur, hanesan iha Korea Súl, Lizboa, Inglaterra hanesan iha Oxford no Reinu Unidu no Australia. Presiza haree nia prosedimentu eh kritériu hirak ne’ebé iha mak fatin iha embaixada, Konsul, area ne’e ema ho mínimu 50, tenke haree orsamentu no seguransa.

Entretantu, prosesu resenseamentu no atualizasaun baze dadus iha rai laran no rai li’ur hahú iha 8 Fevereiru no sei termina iha 28 Marsu.

(Jornalista : Zezito Silva)

(Editór : Manuel Pinto)

iklan
iklan

Leave a Reply

iklan
error: Content is protected !!