Governu Deside Selu Tusan husi BM no BDA

0
97
Enkontru Konsellu Ministru, ohin. Foto GPM

DILI, (TATOLI) – Konsellu Ministru foti ona desizaun atu selu tusan ne’ebé Governu anteriór halo husi Banku Mundiál (World Bank) no Banku Dezenvolvimentu Aziátiku (Asian Development Bank – ADB).

Tuir akordu entre Timor-Leste ho instituisaun sira ne’ebé fó tusan, TL tenke selu osan inan (principal loan) no ninia funan (interest).

Iha tinan 2018 Governu tenke selu tusan hamutuk USD894.171,41 ne’ebé kompostu husi selu osan inan USD265.242,55 no selu osan funan USD628.827,86.

Nu’udar Nasaun ne’ebé halo tusan, tinan-tinan TL tenke selu osan inan no funan, sei la selu sei kona multa no sansaun seluk.

“Penalidade aas tebes bainhira Timor-Leste la kumpri ninia dever, inklui tama iha lista metan (black list), la simu tan grant, osan emprestimu kansela tiha, la bele husu tan osan empresta, no seluk tan”, esplika Ministru Planu no Finansa,  Rui Gomes, liuhosi komunikadu ne’ebé Tatoli asesu.

“Ho penalidade sira ne’e, naran Timor-Leste sai aat no klima ba investimentu sei la favoravel ba Timor-Leste rasik”, tenik Rui Gomes.

Ministru Rui Gomes esplika pagamentu ba TL nia tusan husi ADB no WB ne’e tinan-tinan tenke halo dala rua, iha loron 15 fulan-marsu no loron 15 fulan-setembru.

Tinan kotuk, 2017 TL kumpri ninia dever selu tiha ona ninia tusan hamutuk USD1.305.000 (osan inan no funan ka interest). TL halo tusan husi liur (foreign debt) hahú iha tinan 2012, ne’ebé halo husi instituisaun JICA (Japan International Cooperation Agency ka Ajénsia Kooperasaun Internasionál Japaun nian) hamutuk USD47.000.000 hodi finansia konstrusaun estrada Dili – Baukau no husi ADB USD40.000.000 hodi finansia konstrusaun estrada Dili – Likisa no Tibar – Glenu.

Iha tinan 2013 halo tusan husi ADB USD50.000.000 ba konstrusaun estrada Manatutu-Natarbora; no husi Banku Mundiál USD40.000.000 ba konstrusaun estrada Dili-Ainaro.

Tinan 2015 halo tusan husi ADB USD12.000.000 hodi halo konstrusaun estrada Tasitolu-Tibar. Iha tinan 2016 halo tusan husi ADB USD76.000.000 ba konstrusaun estrada Baukau-Lautém, Maubara-Karimbala, no Atabae – Mota Ain.

Iha tinan 2016 mós halo tusan husi ADB USD50.000.000 ba konstrusaun estrada Dili-Baukau. Ikus liu mak iha tinan 2017 halo tusan husi Banku Mundiál USD 35.000.000 ba konstrusaun estrada Laulara-Solerema. To’o ikus tinan 2017, Timor-Leste nia tusan hamutuk USD 350.000.000. (ki)

HUSIK IDA HATÁN