Governu Aprova Dekretu Lei Instituto da Qualidade

0
291
Ministru Komérsiu Indústria no Ambiente (MKIA), António da Conceição. Foto Antonio Goncalves

DILI, (TATOLI)- Ministru Komérsiu no Indústria (MKI), António da Conceição, hatete Konsellu Ministru (KM) aprova tiha ona dekretu lei ne’ebé posibilita estabelesimentu Instituto da Qualidade.

“Semana liubá ne’e ha’u konstitui ona komisaun instaladora ne’ebé mak atu hahú haree oinsá mak instala Instituto da Qualidade ne’e no iha tempu hanesan atu projeta ona serbisu ne’ebé mak institutu ne’e atu halo, kompeténsia, responsabilidade, funsaun ne’ebé mak atu atribui ba institutu halo”, António hatete iha Komoro, ohin.

Nó mós identifikasaun rekursu umanu ne’ebé iha antes ona no seidauk para serbisu ne’ebé presiza, laboratóriu sai hanesan esensiálmente.

“Se ita hakarak halo Sertifikasaun produtu, serbisu laboratóriu importante lahalimar tanba buat ruma ne’ebé sai ba ema han kontaminadu entaun importante haree, tanba ne’e mak preparasaun ba rekursu umanu importante, maibé ha’u mós garante katak sei lahan tempu tanba komisaun instaladora iha ona no hahú halo serbisu enkuantu formasaun rekursu umanu ne’e iha ona ema na’in-30 ne’ebé haruka bá tuir tiha formasaun iha Portugál, Indonézia para serbisu metrolojia no serbisu seluk iha ona”.

Maibé atu harii institutu ida ne’e implika mós ba osan tanba iha 2018 seidauk iha no hein Governu foun mai signifika iha ona Orsamentu Jerál Estadu (OJE) 2018 nian.

Ligadu ba serbisu AIFAESA nian ministru hatete, AIFAESA ne’e implementa lei iha termu atu haree protesaun ba kunsumidór signifika produtu importasaun presiza atu kontrola.

“Se ita lakontrola ne’e signifika buat ne’e bele liu tiha ona mós ita konsome nafatin no Timór tanba frájil ba iha ekonomia nian, nia hili sasán sira mais baratu no lasignifika di’ak, maibé tanba posivel liu tiha ona prazu mak empreza hakarak hamoos nia armazein sira despaixa mai Timór  no ita sai fali fatin lixu, ida ne’e kontrolu AIFAESA nia importante”.

Maibé iha serbisu seluk ne’ebé ligadu ba ministériu nia, Instituto da Qualidade ne’e tanba indústria ida atu iha, serbisu sira ne’e tenke konstitui parte ida indústria nian atu garante kedan, la’ós sasán tama tiha mak AIFAESA foin bá cek fali, ida ne’e tende iha kedan fábrika nia laran, garante aspetu sanitasaun, tratamentu ambiente, kompozisaun kímika.

“Sasán sira ne’e ligadu hotu ne’ebé laiha kontradisaun ida entre institutu ida ne’ebé mak harii ho mós AIFAESA ninia serbisu”.

Jornalista : Maria Auxiliadora

(Editór : Manuel Pinto)

HUSIK IDA HATÁN