Governu Apela Sidadaun ba Vota, Lalika Rona Rumoris

0
113
Ministru Administrasaun Estatal, Valentim Ximenes. Imajen Mídia Palásiu PR.

DILI, (TATOLI) – Ministru Administrasaun Estatal, Valentim Ximenes, apela ba populasaun atu partisipa iha eleisaun antesipada.

“Ha’u apela ba eleitór sira atu partisipa ativamente iha prosesu ne’e tomak”, Valentim hato’o apelu ne’e bainhira dadalia ho jornalista sira iha Palásiu Prezidente Nicolau Lobato, Bairru Pité, segunda hafoin enkontru ho Prezidente Repúblika, Francisco Guterres Lú Olo, kona-ba preparasaun téknika eleisaun antesipada.

Nia hateten sidadaun sira lalika fiar rumór ne’ebé dehan sei akontese problema iha eleisaun antesipada no nia garante sei la akontese problema tanba forsa seguransa no defeza asegura estabilidade durante eleisaun hala’o.

“Timoroan sira gosta kria rumoris. Bainhira halo rumoris demais ne’e deskoraza ema nia partisipasaun. Hanesan sidadaun tenke uza direitu síviku no direitu polítiku hodi hakbesik ba urnas atu vota”, enkoraza Valentim.

Aleinde ne’e ministru ne’e mós konvida sosiedade sivíl sira, polítiku sira no konfisoens relijioza sira atu partisipa iha eleisaun para bele atinji rezultadu eleisaun ida di’ak hodi atinji Estadu ida forte no governasaun ida estável.

Antes ne’e, Governu liuhusi Ministériu Estatal hamutuk ho órgaun eleitorál hanesan Sekretariadu Tékniku Administrasaun Eleitorál (STAE) no Komisaun Nasionál Eleisaun aprezenta ona kalendáriu eleisaun.

Eleisaun sei akontese iha maiu nia laran no Prezidente Repúblika maka sei dekreta no anúnsia loron eleisaun. 

Jornalista: Xisto Freitas

Editora: Rita Almeida

HUSIK IDA HATÁN