Garuda Dada Aan Atu Hala’o Atividade Iha Timor-Leste

0
623
Foto/Google.

DILI, (TATOLI) – Diretór Ezekutivu Servisu Rejistu no Verifikasaun Emprezariál (SERVE), Florêncio Sanches, hatete tuir informasaun ne’ebé hetan husi Prezidente Autoridade Aviasaun Sivíl Timor-Leste (AASTL) katak kompañia aéreu, Garuda Indonesia, dada aan atu hala’o atividade komersiál iha Timor-Leste.

“Sira hakerek karta ida mai iha ne’e haruka ha’u hein tan uitoan depois hein, agora ha’u simu fali telefone husi Prezidente Autoridade Aviasaun Sivíl nian katak sira dada aan. Ha’u seidauk simu husi Garuda, maibé prezidente mak hatete katak Garuda dada aan no TransNusa la’o bá oin”, Florêncio hatete iha Matadouru foin lalais ne’e.

Tanba TransNusa hala’o ona atividade no sira hakarak kumpri lejislasaun ne’ebé iha tanba sira hala’o atividade sein halo rejistrasaun uluk maka sei aplika dekretu lei 16/2017, artigu 14 hatete se kompañia internasionál halo tiha ona operasaun, maibé sein rejista kona multa U$5000 no tuir lei SERVE tenke aplika ida ne’e.

Diretór Ezekutivu hatutan antes ne’e Garuda prosesa ona dokumentu no hakarak atu semo de’it, maibé lei hatete tenke halo uluk rejistrasaun no kompañia husu atu SERVE fó tempu.

“Karta ofisialmente hakerek husi Jakarta mai ha’u simu depois iha karta ne’e hatete husu ba SERVE I.P atu fó tempu ba sira atu halibur dokumentu no legaliza dokumentu, maibé komu la mai ha’u kontaktu fali Prezidente Autoridade Aviasaun Sivíl dehan sira dada aan ona. Tebes duni sira hakarak dada fila entaun ita mós labele obriga, maibé odamatan nakloke nafatin ba sira atu mai, ha’u mós dúvida hela tanba sá mak depois nia mai hasoru, ita simu sira-nia kandidatura, ikus mai dada aan”.

Nune’e SERVE mós koko halo kontaktu ho empreza ne’e atu konfirma loloos informasaun ne’e, maibé kompañia lasimu telefone.

Aleinde ne’e to’o notísia hatún seidauk hetan mós konfirmasaun husi prezidente AASTL tanba hala’o hela serbisu iha rai-liur.

Jornalista: Maria Auxiliadora

Editora: Rita Almeida

HUSIK IDA HATÁN