Funsionáriu KFP 17 Simu Pose ba Kargu Xefia

0
105
Prezidente Funsaun Públika, Faustino Cardoso. Foto KFP

DILI, (TATOLI) – Prezidente Komisaun Funsaun Públika, Faustino Cardoso, ohin  fó pose ba funsionáriu ho kargu xefia hosi  Xefe Departementu no Xefe Sesaun hamutuk 17 hodi asume kargu durante tinan haat hosi 2018 to’o 2022.

Pose ne’e bazea ba desizaun númeru 2781/2018 KFP hafoin liu selesaun méritu iha loron 5 fulan-fevereiro 2018.

Prezidente KFP, Faustino Cardoso husu ba emposadu sira atu hasae prestasaun servisu hodi hadi’a servisu hodi serbí administrasaun públika ho lais, efisienti, imparsiál no neutru.

“Tenke halo balansu servisu ho edifísiu foun, ema tama mai la’ós orgullu ho edifísiu foun, maibé ema ho  prestasaun servisu ne’ebé  ita iha tuir kategoria ida-idak ne’ebé presta ba públikuʺ, dehan Prezidente KFP iha edifísiu Villa Verde.

Prezidente KFP informa koñese kle’an kapasidade emposadu sira tanba ne’e garante sei asume kargu ne’e ho responsabilidade hodi hadi’a servisu administrasaun públika.

Emposadu nain 17 ne’e kompostu hosi feto neen no mane 11. Sira mak Ubalda Gisela Garcia, xefe departementu ba aprovizionamentu no kontratu, Belizário Rafael Magno Pereira, xefe departementu lojístika no patrimóniu, Maria da Costa Oliveira, xefe departementu planu internu no finansa, Diamantino da Costa Lobo Soares, xefe departementu étika prevensaun no diseminasaun, Lourenco Barros Magno, xefe investigasaun no prosedementu disiplinár, António Amaral, xefe departementu avaliasaun nesesidade kapasitasaun, Sara Correia Castro, xefe departementu kordenasaun interinstitusionál rekursu umanu, Isabel Maria das Neves, xefe departementu formasaun no dezenvolvimentu.

Entretantu, João Amorin Pereira, xefe departementu desznvolvimentu manutensaun baze ba dados funsaun públika, José Pereira Vicente, xefe departementu pensaun no reforma, Constantino Corado, xefe departementu avaliasaun, progresaun distinsaun prémiu, Juvenal Batista Mendonca, xefe departementu kontrolu ba forsa traballu, Alfredo Bili, xefe departementu rekrutamentu, selesaun, nomesaun no promosaun.

Marcelina Irene dos Santos Mesquita, xefe Departementu rekursu umanus ba SCFP, Moisés Almeida Sousa Pedroso, xefe departementu prosesamentu saláriu no vensimentu. Lorga dos Santos, xefe sesaun ba manutensaun bens móvies no imóveis, Diana Cecília da Costa, xefe seksaun arkivu.

KFP Sei Implementa Avaliasaun Kada Fulan

Faustino Cardoso mós hatutan KFP sei halo alterasaun ba dekretu lei ne’ebé regula avaliasaun dezempeñu ba funsiónariu públiku kada tinan sei altera ba kada fulan.

ʺAjenda ami nia primeiru atu hadi’a, altera dekretu lei ne’ebé ko’alia kona-ba avaliasaun dezempeñu ne’ebé ami haree la sufisiente tanba la asegura kualidade servisu funsionáriu ida nianʺ, dehan tan.

Tanba laiha mekanismu ida atu asegura objetividade avaliasaun dezempeñu, alterasaun dekretu lei ne’e importante hodi hasae produtividade servisu kada funsionariu hodi la fó margin ba protesta no reklamasaun.

ʺFulan-fulan tenke halo avaliasaun dezempenu, fó pontuasaun, to’o tinan funsionariu ida-idak hatene ona ninia pontuasaun ne’e média hiraʺ, tenik.

Tuir observasaun balun nota avaliasaun dezempeñu kada tinan mosu irregularidade barak iha prosesu ne’e hodi fó valór la tuir rezultadu servisu kada funsionáriu públiku.

ʺDala balun buat di’ak ne’ebé funsionáriu ida halo iha fulan ikus liu bele apaga buat aat iha fulan sira antes, nomos pelu kontrariu buat aat ne’eb’e funsionáriu halo iha fulan ikus tinan nian bele apaga tiha buat di’ak antesʺ, realsa.

Jornalista: Agapito dos Santos

Editora: Rita Almeida

HUSIK IDA HATÁN