Francisco Jerónimo Eleitu Sai Prezidente FFTL

0
629
Prezidente Eleitu FFTL periodu 2018-2022, Francisco Jerónimo.

DILI (TATOLI)—Eis Prezidente Asosiasaun Futeból Munisípiu Liquiçá, Francisco Jerónimo, eleitu sai Prezidente Federasaun Futeból Timor-Leste (FFTL) ba periodu 2018-2022 liuhusi terseiru kongresu FFTL ne’ebé hala’o iha Hotel Novo Turismo, Lecidere, Dili, sábadu ne’e.

Francisco  Jerónimo sai vensedór ho votus 11 bainhira kompete ho adversáriu membru Komité Ezekutivu FFTL, FIlomeno Fernandes ne’ebé hetan de’it votus 3 no Prezidente Ezersísiu FFTL periodu 2017-2018, Osorio da Costa Florindo ho votus 3.

Membru sira Komité Ezekutivu FFTL.

Kongresista ba kongresu datoluk ne’e mai hosi Asosiasaun Futeból Munisíspiu 13 nomós Asosiasaun Arbitrajen, Asosiasaun Futeból Femenina no Asosiasaun Treinadór.

Kada asosiasaun reprezenta de’it ema ida hodi vota ba kandidatu hirak ne’e, eseptu vota ba vise prezidente FFTL no membru Komité Ezekutivu FFTL, tanba bazeia ba estatutu hosi FFTL rasik.

Iha biban ne’e, kongresista sira eleje mós vise prezidente FFTL no membru sira ba Komité Ezekutivu FFTL nian maka hanesan Falur Rate Laek (primeiru vise prezidente FFTL), Aleixo da Silva Gama “Cobra” (segundu vise) no Germano A. J. da Silva (terseiru vise), Ángelo Lopez (membru Komité Ezekutivu FFTL), Augusto Henriques (membru), Henrique da Costa (membru), Faustino Godinho da Costa (membru), Maria Terezinha da S. Viegas (membru), Simão F. Piedade Babo (membru), Ricardino Sarmento dos Reis (membru).

Entretantu, eis Sekretáriu Estadu Komunikasaun Sosiál, Nélio Isaac Sarmento kontinua asumi kargu nu’udar Sekretáriu Jerál FFTL tanba indika hosi Prezidente foun FFTL, Francisco Jerónimo.

Kongresista sira iha oportunidade ne’e eleje mós Eis Prezidente FFTL, Francisco Kalbuadi Lay sai prezidente honorer, enkuantu Osorio da Costa Florindo no Filomeno Fernandes nu’udar membru honorer.

Prezidente eleitu FFTL, Francisco Jerónimo hateten programa ne’ebé nia atu implementa iha nia mandatu maka hametin FFTL, kontinua programa FFTL ne’ebé iha ona hanesan prepara jagadór sira ho kualidade atu reprezenta nasaun ba rai liur no serbisu hamutuk ho Asosiasaun Futeból Munisípiu atu bele haburas futeból iha Timor laran tomak.

Nune’e mós, eis Prezidente ezersísiu FFTL, Osorio Florindo hateten iha kompetisaun demokrasia, lakon ne’e normál, maibé nia orgullu tanba iha nia mandatu konsege hala’o Terseiru Kongresu.

“Ha’u orgullu tanba konsege realiza kongresu hodi lori FFTL sai hosi situasaun sansaun hosi FIFA. Falta oituan de’it FFTL hetan sansaun hosi FIFA tanba periodu rua la hala’o kongresu. Orgullu mós tanba konsege rezolve problema balun ne’ebé FFTL hasoru hanesan dívidas,” Osorio haktuir. (Jornalista: Xisto Freitas)

 

HUSIK IDA HATÁN