FDCH Partilla Progresu Dezenvolvimentu Rekursu Umanus ba MNEC

0
182
FOTO Mídia FDCH

DILI (TATOLI)—Fundo de Desenvolvimento do Capital Humano (FDCH) partilla  informasaun kona-ba ezisténsia FDCH nian no progresu dezenvolvimentu rekursus umanus  Timor-Leste nian durante ne’e ba Ministério dos Negócios Estrangeiros e  Cooperação (MNEC).

Enkontru ne’ebé hala’o iha salaun konferénsia MNEC ne’e partisipa direta hosi S.E Ministru Negósiu Estranjeiru no Kooperasaun Aurelio Cristóvão Guterres ho ninia Vise Ministra Sra. Adaljiza Magno, Embaixadór sira, Diretór sira  no funsionáriu sira MNEC nian.

FOTO Mídia FDCH

Ministru MNEC Aurélio Cristóvão Guterres hato’o obrigado ba prezensa Sekretáriu Executivo FDCH  ho ninia ekipa hodi partilla informasaun kona-ba dezenvolvimentu rekursu umanus iha rai laran  tanba dezenvolvimentu rekursus umanus nu’udár prioridade nasionál ida ba governu no estadu.

 “Prezensa Sekretáriu Executivo iha ne’e ajuda para ita hotu entende didi’ak objetivu FDCH ne’e rasik, depois benefísiu saida de’it liu-liu ba servidór estadu nian, inklui sira ne’ebé agora eskola iha fatin ruma karik bele benefisia formasaun, ita hotu hatene katak prioridade nasionál ida ba ita nia rai no ba governu ida ne’e mak rekursus umanus, dezenvolvimentu kapasidade rekursu umanu ne’e,” hatete Sr. Aurelio Guterres  iha ninia diskursu ba abertura enkontru ne’e.

Ministru ne’e hateten importante tebes diplomata sira iha koñesimentu kona-ba dezenvolvimentu rekursus umanus iha rai laran nune’e ajuda sira halo servisu iha rai li’ur tanba ko’alia kona-ba Timor-Leste atu tama ba Association Of South East Asia Nation ( ASEAN) ema sempre husu be-beik dezenvolvimentu rekursus umanus Timor-Leste nian to’o iha ne’ebé.

Entretantu Sekretáriu Executivo Fundo de Desenvolvimento do Capital Humano Isménio Martins da Silva agradese ba oportunidade ne’e hodi fahe progresu dezenvolvimentu rekursus umanus iha Timor-Leste hahú hosi ezisténsia FDCH hosi 2011 to’o mai ohin loron.

“Iha ámbitu ita dezenvolve rekursus umanus ba ita nia governu, ita nia estadu, Fundo de Desenvolvimento do Capital Humano ohin hetan oportunidade ida di’ak tebe-tebes e agradese ba MNEC ne’ebé konvida Fundo de  Desenvolvimento do Capital Humano  atu partilla informasaun balun kona-ba mekanizmu no prosesu sira ne’ebé iha ba dezenvolve polítika rekursus umanus,” Hatete Secretário Executivo FDCH Isménio Martins da Silva

Sekretáriu Executivo konsidera oportunidade ne’e di’ak tebes tanba bele iha enkontru ida ho Ministru, Vise embaixadóres  diretór jerais, diretór sira ne’ebé iha MNEC no  tékniku sira tanba sira dezempeña servisu ne’ebé importante atu partilla informasaun kona-ba Timor-Leste  ba iha mundu.

Benefisiáriu FDCH hahú hosi ninia ezisténsia iha 2011 to’o mai ohin loron hamutuk 60 mill resin ne’ebé mai hosi setór públiku no privadu liu hosi programa prinsipál haat FDCH nian hanesan: Formasaun Profisionál; Formasaun Téknika; Bolsa estudu; no Tipu Formasaun Seluk.

(MEDIA FDCH)

HUSIK IDA HATÁN