F-FDTL Labele Sadere Ba Partidu

0
168
Prezidente Repúblika no Komandante Supremu Forsas Armadas, Francisco Guterres Lú Olo, bainhira hato’o nia deskursu iha aniversáriu F-FDTL ba dala 17 iha Kuartel Jerál F-FDTL, Fatuhada, Dili, ohin. Imajen Ajénsia Tatoli/António Gonçalves.

DILI, (TATOLI) — Prezidente Repúblika no Komandante Supremu Forsa Armada, Francisco Guterres Lú Olo, hateten instituisaun FALINTIL-Forsa Defeza Timor-Leste (F-FDTL) labele sadere ba partidu polítiku ne’ebé de’it.

“Importante ba ita hotu hatene katak ita-nia instituisaun militár iha karáter nasionál no apartidáriu katak labele haliis ba partidu ne’ebé de’it”, Xefe Estadu deklara asuntu liuhusi ninia deskursu iha aniversáriu F-FDTL ba dala 17 iha Kuartel Jerál F-FDTL Fatuhada, sesta ne’e.

Nia hatete importante ba F-FDTL kaer metin prinsípiu no valór sira ne’ebé fó sentidu no hatutan ninia ezisténsia no konseitu kona-ba soberania no independénsia nasionál.

“Forsa Armada nu’udar riin prinsipál Nasaun ida ne’e nian, nu’udar eskola ba virtudes no ba sidadania, nu’udar instituisaun ne’ebé garante soberania no defeza ba ita-nia rai doben, hala’o funsaun sosiál importante ba vijilánsia, atu hasees no korrije fatór sira ne’ebé hamenus ita-nia dignidade no bolu beibeik atensaun atu tanen aas valores sira ne’ebé identifika ita, nu’udar timoroan”, afirma.

Lú Olo hatutan Nasaun ida iha mehi no hakarak tenke iha Forsa Armada ida ne’ebé hetan fiar hosi ema hotu, ho ekipamentu no kualifikasaun atu kumpre ho di’ak ninia misaun atu tau matan ba territóriu nasionál ida ne’ebé kompostu ho rai keta-ketak, tasi no lalehan.

“Ho laran ksolok tebes maka ha’u nu’udar Prezidente Repúblika no Komandante Supremu Forsa Armada nomós nu’udar sidadaun sei buka fó-hatene momoos no beibeik ba públiku kona-ba kapasidade F-FDTL nian, atu afirma-án nu’udar instituisaun ida ne’ebé haka’as-án beibeik hodi defende valór étiku umanu importante ba ita-nia Pátria. Valór sira ne’e maka espíritu sakrifísiu, dedikasaun, dixiplina, obediénsia no laran luak atu serve Timor-Leste, iha momentu ne’ebé de’it”, salienta.

Nu’udar instituisaun, Lú Olo afirma xefia militár labele nonok de’it ba mudansa sira ne’ebé akontese iha mundu. Katak, xefia militár iha direitu atu akompaña akontesimentu boot sira ne’ebé afeta vida polítika no sosiedade sivíl iha Timor-Leste no nakfila komportamentu, valór no mentalidade.

Nune’e nia dehan, importante tebes dignifika, reforsa no hasa’e kapasidade F-FDTL nian ho finansiamentu ba hasa’e kualidade infra-estrutura sira ba vida militár no ba sira-nia instrusaun no treinu.

“Timor-Leste tenke kontinua fó formasaun, treina no moderniza ninia Forsas Defeza, tuir kritérius nesesidade no efisiénsia. Tuir lei no hare’e ba Konseitu Estratéjiku ba Defeza no Seguransa, ne’ebé aprova ona, ha’u hanoin katak importante tebes kontinua hakerek dokumentus estratéjikus atu hasa’e kapasidade operasionál F-FDTL nian”, tenik eis komandante gerileiru.

Nia hateten nia sei haree hamutuk nafatin ho órgaun soberania sira seluk oinsá hadi’a no moderniza F-FDTL atu bele halo atuasaun ho susesu iha momentu ne’ebé de’it.

Jornalista: Xisto Freitas

Editora: Rita Almeida

HUSIK IDA HATÁN