Ezekusaun DOT 66% Ekivale Millaun 66.7

2
270
Vise-Ministra Planu no Finansa (MPF), Sara Lobo Brites, akompaña husi Diretór Jerál Orsamentu Estadu, Januario da Gama, halo konferénsia imprensa sobre DOT janeiru-fevereiru nian.

DILI (TATOLI)- Vise-Ministra Planu no Finansas (MPF), Sara Lobo Brites, hatete ezekusaun agregadu ba Dotasaun Orsamentu Temporáriu (DOT) iha Janeiru nian konsege ezekuta ona porsentu 66 ekivale ho valór monetáriu millaun 66.7.

“Saláriu no vensimentu ita iha porsentu 83.5, bens no servisu porsentu 44.9, kapitál dezenvolvimentu porsentu 64.3 no transferénsia públika porsentu 85.3. Persentajen ne’e hatudu rezultadu di’ak iha janeiru ho valór monetária pur volta millaun 66.7, ida ne’e hatudu esforsu di’ak husi parte hotu hodi ezekuta DOT janeiru nian”, Sara dehan iha edifísiu MPF iha ámbitu distribui pakote DOT ba fevereiru nian ba ministériu no instituisaun Estadu sira.

Aleinde ne’e iha implementasaun duodésimu janeiru nian iha mós difikuldade balun hanesan pagamentu ba saláriu ne’ebé akontese iha payroll tenke halo ajustamentu bainhira atu prosesa ona saláriu tuir kalendáriu payroll nian.

“Divizaun barak iha défise, balun iha númeru ki’ik, pur tantu ida ne’e hanesan referénsia ida ba iha ita-nia dotasaun fevereiru, hotu-hotu rekursu umanu ka finansa bele uza referénsia ne’e para pró-ativu uitoan antesipa ona orsamentu ne’ebé mak sufisiente para payroll bele hala’o nia pagamentu”.

Duodésimu janeiru nian tuir alokasaun ne’ebé distribui ona iha fulan kotuk ne’e ho montante millaun U$101 ba Estadu tomak no iha nia ezekusaun pur volta porsentu 66 ka ekivale ho valór monetáriu millaun 66.7.

Enkuantu iha duodésimu fevereiru nian, ohin mak halo distribuisaun no nia persentajen ba ezekusaun ne’e hafoin fulan ne’e remata no alokasaun DOT fevereiru nian ne’e ho montante mantein hanesan janeiru nian.

Jornalista : Maria Auxiliadora

(Editór : Manuel Pinto)

2 COMMENTS

  1. MPF: Ministeriu Planu no Finansas

    Favor aumenta s iha Finansa

    Bele hare iha MPF nia website rasik.

    Obrigado

HUSIK IDA HATÁN