Eskola FEST Konstrui Tuir Ambiente Japaun

0
118
Reitór UNTL kaer liman ho reprezentante JICA. Foto: UNTL

HERA (TATOLI)—Reitór Universidade Nasionál Timor-Leste  (UNTL), Francisco Miguel Martins, informa edifísiu foun ba Fakuldade Enjeñaria, Siénsia no Teknolojia (FEST) iha Hera sei hahú harii tuir ambiente Japan nian, iha kraik ho uzu “Mola” ne’ebé anti rai nakdoko

“Konstrusaun edifísiu iha tolu ho pizu tolu ne’ebé hahú ho fundasaun mola hodi antesipa rai nakdoko, modelu ne’e kompañia Japan mak kaer no konstrui tuir ambiente Japan nian,” Francisco Miguel Martins informa ba Jornalista sira hafoin serimónia hatuur fatuk dahuluk ba projetu konstrusaun edifísiu foun FEST iha Hera, Munisípiu Dili, Tersa (20/02).

Nia esplika konstrusaun modelu Japaun, kuandu konstroi edifísiu bo’ot sira hahú ho mola ho intensaun antesipa rai nakdoko, Normalmente edifísiu sira uza modelu Japaun bainhira akontese rai nakdoko vidru eh edifísiu sei la estragadu no edifísiu book-an de’it ho natureza anin eh rai nakdoko.

“Mezmu ambiente Timor-Leste la hanesan eh la risku hanesan ambiente Nasaun Japan nian maibé sira hatoman an hodi konstrui edifísiu iha fatin ne’ebé de’it ho modelu nune’e,” Nia reforsa tan.

Edifísiu tolu ho pizu tolu ne’ebé kompleta ho aula aprendizajen, laboratóriu ba departamentu hotu, sala profesór sira, sala administrasaun, kantina, auditóriu ho 400 asentu.

Iha konstrusaun ne’e estudante finalista enjeñaria hamutuk na’in 10 mak sei partisipa iha projetu ne’e atu hetan esperiénsia direita no konkreta inklui mós estudante estajiáriu sira sei aproveita hodi halo prátika iha obra ne’e.

Obra ne’e finansia hosi Governu Japaun, ho totál orsamentu $ 21 Milaun no Kompañia Nissan Construction Co, Ltd mak sei implementa servisu konstrusaun, Ogawa Seiki Co, Ltd mak sei submete ekipamentu hotu no sei hetan supervizaun hosi Consortium of Yamashita Sekkei Inc. And intem Consulting, Inc. Enkuantu projetu ne’e sei finaliza iha fulan Jullu tinan oin (2019).

(Jornalista :Zezito Silva)

(Editór : Manuel Pinto)

HUSIK IDA HATÁN