Empreza 1.755 Mak IJT Halo Ona Inspesaun Iha 2017

0
135
Inspetór Jerál Traballu, Sekretáriu Estadu Juventude no Traballu, Aniceto Leto Soro. Foto Tatoli/Egas Cristovão.

DILI, (TATOLI)-Inspetór Jerál Traballu, Sekretáriu Estadu Juventude no Traballu, Aniceto Leto Soro, hatete, Iha 2017 Inspesaun Jerál Traballu (IJT) hala’o vizita  inspesaun bá empreza sira iha territóriu Timor-Leste ho totál 1.755 no halo ona kobertura ba traballadór hamutuk 24.908.

“Traballadór lokál iha 20.728 no estranjeiru ne’e iha 4.180. Iha vizita ne’e ami identifika irregularidade lubuk ida ne’ebé mak akontese hamutuk 422, ami haree katak pur volta porsentu 24 husi totál porsentu ne’e iha violasaun ba lei númeru 4/2012, lei traballu nian nó mós lei sira ne’ebé liga ho indústria hanesan lei greve, seguransa ijiene no traballu, nó mós liga ho asidente traballu nian no irregularidade sira ne’e ami tenke aplika medida ba sira”, Aniceto hatete iha Kaikoli, ohin.

Medida ne’ebé fó ne’e ho objetivu atu hadi’a irregularidade ne’ebé identifikadú hanesan 422 atu nune’e labele halo violasaun, bainhira kontinua maka sei aplika sansaun.

“Ami foti medida ba empreza sira ne’e, fó auto adverténsia ho fó tempu ba sira atu hadi’a, aleinde ne’e ami mós aplika fó auto notísia ne’e katak iha violasaun ne’ebé grave ne’e tenke aplika multa. Sansaun ne’ebé konstitui auto notísia iha 336 (empreza), lokál iha 68 no internasionál 268”.

Husi 336 ne’e rezulta multa ne’ebé mak tenke selu ba kofre Estadu Timor-Leste liuhusi inspesaun, nune’e rekolla ona totál multa to’o ohin loron hamutuk U$385,455.

“Husi prosesu ida ne’e, sira ne’ebé halo pagamentu finál ona, ba ona kofre Estadu maka iha mil 231.99 , seluk sei iha prosesu tanba sei aprezenta sira-nia defeza tanba konsidera lá halo irregularidade ba akuzasaun ne’ebé Inspesaun Jerál Traballu akuza ba emprezáriu sira”.

(Jornalista : Maria Auxiliadora)

(Editór : Manuel Pinto

HUSIK IDA HATÁN