Ema Laduun Gosta Liafuan Peniténsia Iha Kuarezma

0
62
Ilustrasaun

DILI, (TATOLI) – Padre kapelaun Universidade Nasionál Timor Lorosa’e, Adriano Ximenes, hatete tempu kuarezma liafuan importante atu ema bele moris tuir dalan loos mak peniténsia, liafuan ida ne’ebé ema laduun gosta atu rona.

“Peniténsia liafuan ne’ebé ita laduun gosta rona katak ita husik buat ruma ne’ebé ita gosta hodi moris livre husi nia; la iha buat seluk ne’ebé mak manda ita”, esplika padre kapelaun UNTL bainhira prezide misa hahú tinan letivu 2018 nian iha igreja katedrál, sábadu ne’e.

Amu fó komparasaun ho tempu uluk, jerasaun sira uluk molok toba no hafoin hadeer ema halo uluk mak orasaun, agora molok atu toba no hafoin hadeer, ema haree uluk mak telefone.

Liafuan importante seluk atu ema bele moris tuir mak orasaun. Katak aumenta orasaun nu’udar aktu komunika no ko’alia ho Maromak ho belun eh maluk sira iha sosiedade nia laran.

Nu’udar sarani no akadémika tenke halo karidade; fó buat ruma ho justu ba ema seluk. La’ós tanba iha ka lae mak fó. Tan ne’e, orasaun, peniténsia no karidade importante atu bele moris tuir dalan loos nian iha tempu ohin loron.

“Ita hotu aplika buat tolu ne’e iha tempu kuarezma nia laran loro-loron. Depois ita halo saida? Loron semana santa, sábadu santu nia laran ita sei sente livre liu, kamaan liu tanba ita sei hetan buat ne’ebé importante”, padre ne’e husu atu sarani ka komunidade akadémika atu kumpre.

Nia hatutan tan: “Ha’u hein katak ida ne’e sei loos ba ita hotu iha misa ida ne’e no sai loos ita-nia kompromisu iha kuarezma, iha tempu tomak nia laran, iha ita-nia eskola, iha ita-nia família atu ita bele sai joven, sai adultu ne’ebé livre, la hadook aan husi Maromak, husi ita-nia maluk iha sosiedade”, konklui.

Jornalista: Rafy Belo

Editora: Rita Almeida

HUSIK IDA HATÁN