Defisiente Matan Husu Governu Prepara Bulletin Votu Espesiál

0
98
Diretór ezekutivu ba Asosiasaun halibur defisiente Matan Timor Leste, Gaspar Afonso , hatudu bulletin votu espesiál ba Sekretáriu Estadu Konsellu Ministru no Komunikasaun Sosiál, Matias Boavida.

DILI (TATOLI)-Diretór ezekutivu ba Asosiasaun halibur defisiente Matan Timor Leste, Gaspar Afonso husu ba Governu hodi prepara bulletin votu espesiál ba ema ho defisiénsia matan hodi prevene manipulasaun, iha eleisaun antisipada.

Dirijente ba asosiasaun matan hato’o preokupasaun ne’e liuhosi Sekretáriu Estadu Konsellu Ministru no Komunikasaun Sosiál, Matias Boavida iha edifísiu asosiasaun iha Manleuana Dili, Segunda Ohin.

Durante ne’e ema defisiente matan mós partisipa iha eleisaun, maibé konsidera laiha segredu absoluta tanba hetan apoiu vota hosi ema seluk. Tanba ne’e iha eleisaun antisipada 12 Maiu 2018, ema ho defisiente matan hakarak hetan tratamentu espesiál hodi prepara bulletin votus espesiál atu nune’e ema hotu hetan tratamentu hanesan tuir konstituisaun RDTL artigu 16.

ʺEma sempre lori ami tama ba vota nee ami sente ami nia diretu la absoluta tanba ami la hare tanba ne’e prepara bulletin votus espesiál ba ami defisiente matan,ʺ nia hateten.

Hodi akresenta, modelu bulletin ne’ebé STAE no CNE prodúz fasil atu ema seluk manipula diretu ema ho defisiénsia matan bainhira ezerse sira nia diretu votu iha eleisaun.

ʺAmi hetan sample ida hosi Indonézia (Bulletin votus espesiál ba ema ho defisiente matan) bainhira iha reuniaun konsellu Ministru bele hato’o,ʺ nia hameno.

Iha fatin hanesan, Sekretáriu Estadu Konsellu Ministru no Komunikasaun Sosiál, Matias Boavida hateten, sei informa asuntu ne’e iha reuniaun estraordináriu konsellu Ministru iha Tersa (Aban-red)

ʺHa’u labele fó garantia katak bele, maibé ha’u sei hatutan ita boot sira nia lian iha reuniaun konsellu ministru,” Sekretáriu Estadu  fó komentáriu.

Entretantu, ema ho defisiénsia matan hamutuk rihun 24.240 ne’ebé maka rejista tuir sensu uma kain tinan 2015. Iha Konstituisaun RDTL artigu 16 hateten, universalidade no igualdade. 1. Sidadaun hotu-hotu hanesan iha lei nia oin, no mós iha direitu no obrigasaun hanesan. 2. Labele halo diskriminasaun ba ema ida tanba nia kulit, nia rasa, nia estadu sivíl, nia seksu, orijen étniku, nia lian, pozisaun sosiál eh ekonómiku, hanoin polítiku ka ideolojia, relijiaun, instrusaun eh nia kondisaun fízika eh mentál.

(Jornalista: Agapito dos Santos)

(Editór : Manuel Pinto)

HUSIK IDA HATÁN