CNRT, PLP no KHUNTO Konkorda Proposta Kalendáriu EA

0
334
Reprezentante partidu polítiku sira, CNE no STAE hasai foto hamutuk ho Prezidente Repúblika, Francisco Guterres Lú Olo, hafoin enkontru kona-ba kalendáriu eleisaun. Imajen Mídia Palásiu PR.

DILI (TATOLI)—Partidu tolu hanesan Congresso Nacional da Reconstrução de Timor (CNRT), Partidu Libertasaun Populár (PLP) no Kmanek Haburas Unidade Timor Oan (KHUNTO) laiha objesaun ba proposta kalendáriu Eleisaun Antesipada (EA).

Vise Prezidente Partidu Libertasaun Populár (PLP), Fidelis Leite Magalhães hateten sira konkorda ho proposta kalendáriu ne’ebé aprezenta hosi Komisaun Nasionál Eleisaun (CNE-Sigla Portugés) no Sekretariadu Tékniku Administrasaun Eleitorál (STAE).

“Ami hanoin data eleisaun ne’e di’ak no natoon atu organiza eleisaun ida ne’ebé moos no transparente,” Fidelis dehan kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, Kuarta ne’e, hafoin enkontru ho Prezidente Repúblika, Francisco Guterres Lú Olo, kona-ba konsultasaun kalendáriu eleisaun.

Nia hatutan PLP hakarak Timor ida ne’ebé  moris iha armonia nia laran tuir dalan demokrasia ninian. “Kompromisu maka ida ne’e, sei la muda no hamenus maibé sei hasa’e liu-tan armonia no valór demokrasia,” Fidelis esplika.

Iha fatin hanesan, Prezidente Konsellu Diretiva Nasionál partidu CNRT, Dionísio Soares Babo, apresia kalendáriu eleisaun ne’ebé Prezidente Repúblika sei dekreta, maibé presiza haree finansiamentu mai hosi ne’ebé hodi organiza eleisaun.

Nia mós dehan katak tenke haree didi’ak kestaun atualizasaun baze dadus  tanba tinan kotuk tasa partisipasaun eleisaun ne’e menus no kompromete katak CNRT sei la’o tuir lei no Konstituisaun.

Aleinde ne’e, Prezidente Partidu Kmanek Haburas Unidade Timor Oan (KHUNTO), Armanda Berta dos Santos hateten KHUNTO konkorda data eleisaun ne’ebé órgaun eleitorál (CNE no STAE) propoin no kompromete katak KHUNTO sei garante pás no estabilidade iha nasaun laran.

(Jornalista: Xisto Freitas)

(Editór : Manuel Pinto)

HUSIK IDA HATÁN