CNE Mak Sei Deside Koligasaun Partidu La’ós TR

0
456
Prezidente CNE, Alcino de Araújo Baris. Foto mídia CNE

DILI (TATOLI) –Prezidente Komisaun Nasionál Eleisaun (CNE-sigla iha portugés), Alcino Barris, informa koligasaun Partidu Polítiku ida, tenke liuhosi órgaun eleitorál ne’e labele husi Tribunál Rekursu (TR).

“Koligasaun tenke liuhosi CNE, labele diretamente ba Tribunal Rekursu, kuandu liuhosi Tribunal Rekursu sei la simu tanba  lei dehan katak tenke liuhosi CNE”, Alcino Barris informa iha konferénsia imprensa ne’ebé realiza iha salaun CNE, ohin.

Nia dehan tuir kalendáriu operasaun eleitora s ba eleisaun antisipada Parlamentu Nasionál (PN), aprezentasaun konstituisaun koligasaun partidária ba CNE, hahú fiksasaun loron eleisaun parlamentár 2018 tama iha vigor iha loron 20 Fevereiru 2018 no sei remata iha loron 12 Marsu 2018 ka prazu 20 dias hafoin publikasaun dekretu prezidensiál.

CNE mak sei deside Partidu Polítiku koligasaun ida bele pasa eh lae bainhira haree kondisaun, sei parte koligasaun la konkorda karik bele konkorre ba TR atu reeve fali desizaun husi CNE.

CNE hanesan órgaun administrasaun eleitorál, lei fó kompeténsia atu hare, apresia, verifika no halo desizaun konaba aktu eleitorál tanba  ne’e sei reúne kondisaun CNE deside pasa eh sei la pasa tanba  la reúne kondisaun iha koligasaun ida.

Koligasaun partidu polítiku balun ba hatama estatutu koligasaun iha TR, maibé lei dehan ida ne’e kompeténsia CNE nian. Bainhira atu aprezenta lista kandidatura ne’ebé atu tuur iha PN mak ba aprezenta iha TR.

Konaba aprezentasaun lista kandidatura, hahú husi loron fiksasaun loron eleisaun parlamentár 2018 tama iha vigor iha loron 20 Fevereiru 2018 to’o 22 Marsu 2018 ka prazu 30 dias hafoin publikasaun dekretu prezidensiál.

Nune’e, Alcino aviza ba Partidu Polítiku koligasaun sira tenke kuidadu ho prazu tanba  liu loron ne’ebé marka ona, tuir regra la válidu ona.

“Dala ruma ita aviza ne’e para labele anggap enteng, (konsidera fasil) ita tenke tuir mós rekizitu atu iha direitu tomak hodi konkorre”, nia dehan tan.

Agora daudauk, TR sei hein koligasaun partidu polítiku husi CNE ne’ebé sei verifika hafoin haruka ba Sekretariadu Tékniku Administrasaun Eleitorál (STAE) halo publikasaun iha Jornál Repúblika, hafoin aprezenta lista kandidatura iha TR.

Nune’e, ba Partidu polítiku sira ne’ebé hakarak avansa mesak, Alcino fó hanoin, iha tempu 30 dias hafoin publikasaun dekretu prezidensiál para hatama lista kandidatura iha TR, maibé koligasaun tenke liu CNE.

(Jornalista: Julia Chatarina)

(Editór : Manuel Pinto)

HUSIK IDA HATÁN