CNE Hato’o Preokupasaun Kona-ba Transporte ba Xefe Governu

0
188
Prezidente CNE, Alcino Barris. Foto Antonio Goncalves

DILI, (TATOLI) – Komisaun Nasionál ba Eleisaun (CNE-sigla portugés) ohin halo audiénsia ho Primeiru-Ministru, Marí Alkatiri iha Palásiu Governu hodi hato’o atividade ne’ebé sira hala’o hela iha kualidade Eleisaun Antesipada (EA), liu-liu edukasaun sívika ne’ebé hala’o iha munsípiu 13.

“Dezafiu oi-oin iha transporte, ida ne’e sai mós pontu ida ami hasoru malu ho primeiru-ministru, ami koloka oinsá ami bele hetan tan reforsa, parte lojístika nian, transporte para apoiu pesoál sira ne’ebé iha hela terenu tanba iha tempu udan”, Prezidente CNE, Alcino Barris, informa ba jornalista sira hafoin hasoru malu.

Nia hatutan hasoru malu ne’e maneira oinsá atu halo atendimentu ba timoroan sira ne’ebé hela iha rai li’ur.

Tanba tuir lei resenseamentu eleitorál kona-ba ema sira ne’ebé atu serbisu iha rai li’ur liuhusi Ministériu Negósiu Estranjeiru; indika pesoál sira ne’ebé atu fasilita serbisu iha rai li’ur.

“Tanba ne’e mak ami koordena ho governu oinsá haree posibilidade husi governu nian, fasilita oinsá mak CNE ho STAE (Sekretáriadu Téknika Administrasaun Eleitorál) atu bele ajuda halo resensia timoroan sira ne’ebé mak hela iha rai li’ur no preparasaun sira seluk, haree mós ba dekretu governu desde que iha buat balun bele re-ajusta”, akresenta.

Prezidente CNE hatutan tan: “Buat balun regula ona iha lei, lae! Maibé iha dekretu governu de’it, karik iha marjen ruma atu bele revé fali, para tantu CNE, STAE bele halo kna’ar, atendimentu ba eleisaun ne’e ho di’ak liutan”.

No fundo atu garante katak eleisaun ida ne’e eleisaun ida satisfatóriu, tenta atu minimiza iregularidade no hakarak hasa’e nia kualidade atendimentu ida para públiku tomak bele fasilmente hetan satisfasaun”, afirma.

CNE mós tenta oinsá atu akomoda eleitór sira ne’ebé  atu vota, karik sira iha momentu eleisaun la iha kondisaun ba iha fatin sira seluk.

Enkuantu sira hakarak vota maibé tenke hanesan; mai husi Viqueque, vota iha Viqueque. Husi Bobonaro fila ba Bobonaro, Baukau, tantu Ermera no seluk tan haree uluk ba posibilidade, ema hakarak vota nia tenke fila fali.

“Ne’e mak agora ami propoen haree to’ok saida mak lei dehan, saida mak dekretu governu anteriór ne’e regulariza, haree posibilidade re-ajusta para akomoda no másimo (ho másimu) eleitór sira-nia partisipasaun”, nia dehan.

Labele Transfere

Sistema votu hahú husi 2007 mai to’o agora labele fó. Transferénsia votu ne’e akontese de’it iha 2002, husi partidu sira ne’ebé la to’o bareira ba partidu seluk ne’ebé konsege. Bareira pursentu tolu iha 2012, pursentu haat iha eleisaun jerál 2017. Uza ida ne’ebé mak liu bareira pursentu haat pois liutiha oinsá halo kontajen kona-ba kadeira.

“Kadeira hira-hira ita la siik kedas, tenke nia métodu ne’ebé sistemátiku, hotu-hotu hatene, ami fó ona edukasaun iha Timor laran kuaze hotu-hotu hatene ona, hela mídia mak seidauk hatene. Ami sei fó khusus (espesífiku) ba ita-boot sira”, katak.

Jornalista: Rafy Belo

Editora: Rita Almeida

HUSIK IDA HATÁN