Auto Estrada ‘Difikulta’ Komunidade Kovalima

0
146
Primeiru-Ministru, Marí Alkatiri, bainhira hatan preokupasaun komunidade Kovalima iha atividade konsultasaun programa governu dahituk nian iha salaun administasaun munísipiu Kovalima, ohin. Foto GPM

KOVALIMA, (TATOLI) – Administradór Munisípiu Kovalima, Afonso Nogueira Lay, hateten mega projetu hanesan auto estrada difikulta komunidade Kovalima atu hala’o sira nia atividade.
Nia haktuir laiha dalan alternativu ba komunidade atu ultrapassa auto estrada refere hodi ba sira nia to’os, natar no atividade sira seluk.

“Ami infrenta problema ba implementasaun mega projetu liu-liu auto estrada tanba laiha dalan pasajen ba iha ami nia komunidade hodi hakat liu-ba iha sira nia to’os, natar, haree karau, asesu mai iha merkadu, eskola no ospitál”, Administrador levanta kestaun ne’e iha konsultasaun Programa Sétimu Governu Konstitusionál ne’ebé hala’o hosi Primeiru-Ministru, Marí Alkatiri, ho membru governu sira iha salaun administrasaun munisípiu Kovalima, Suai Vila, sesta ne’e.

Afonso haktuir tan dala barak ona sira halo koordenasaun ho kompaña internasionál ne’ebé responsabiliza ba grande projetu ne’e no kompaña ne’e responde sira prontu loke dalan alternativu maibé presiza karta ofisiál ida hosi Ministériu Obras Públikas.

“Tanba ne’e maka ha’u ho Administrasaun Postu sira, Xefe Suku sira no komunidade tenta hakerek surat ida ba antigu Ministru Obras Publikas, Gastão Sousa no atual vise Ministru Obras Publikas maibé laiha solusaun”, katak.

Iha biban ne’e, Afonso mós levanta bee dalan hosi projetu auto estrada mesak kloot de’it, tan ne’e bee sulin sai ba liur hodi afeta ba komunidade sira nia uma iha Maucola (Suco Beco), Fatuleto (Julo) no Taz-Hilin hosi Postu Administrativu Zumalai nian.

Tanba ne’e, Administrador husu ba Governu atu buka dalan oinsá rezolve problema ida ne’e, nune’e asegura komunidade labele sai vítima ba dezenvolvimentu.

Hatan ba ne’e, Xefe Governu dehan normalmente bainhira halo auto estrada sempre harii ponte ida iha auto estrada nia leten para fasilita ema hodi ultrapassa.

Nia hatutan tanba projetu ne’e foin hahú, entaun komplikadu. Afirma tan tempu tuir mai nia rasik maka sei halo inspesaun ba projetu ne’e atu bele fó solusaun ba problema ne’ebé mosu.

Kona-ba bee dalan ne’ebé kloot, PM realsa loloos molok halo bee dalan, tenke halo estudu ba kapasidade bee no tenke halo fiskalizasaun ba bee dalan refere.

Nia salienta kuandu halo estrada ida permanente, tenke halo estudu oin tolu ne’ebé fundamentl maka hanesan estudu ba konsisténsia rai, jeolojia no estudu hidroliku.

“Bainhira la halo estudu didiak ba bee dalan, aban bainrua estrada sira ne’e sei aat hotu tanba bee nu’udar inimigu ba estrada”, afirma tan.

Jornalista: Xisto Freitas

Editora: Rita Almeida

HUSIK IDA HATÁN