Assanami: Liberta Povu ho Programa

0
177
Prezidente Partidu Demokrátiku, Mariano Assanami Sabino ko'alia ho jornalista sira iha Palásiu Prezidensiál. Foto Tatoli/Xisto Freitas

DILI, (TATOLI) – Prezidente Partidu Demokrátiku (PD), Mariano Sabino Assanami, hateten rezisténsia hasoru okupasaun estranjeira ba ukun rasik án ema hotu-hotu halo, tan ne’e agora ko’alia kona-ba programa oinsá atu liberta povu.

“PD la aseita ema balun ko’alia fali rezisténsia no utiliza rezisténsia nu’udar instrumentu hodi fahe fali Frente Diplomátiku, Frente Armanda no Frente Klandestina. Frente sira ne’e importante hotu maka ohin loron Timor-Leste atinji ukun rasik án”, Assanami hato’o ba jornalista sira iha Palásiu Prezidente Nicolau Lobato, Bairru Pité, kuarta ne’e, hodi responde preokupasaun kona-ba grupu balun hahú lansa propaganda hodi soran Frente Armada, Diplomátiku no Klandestina.

Nia dehan programa maka bele moderniza sosiedade no transforma sosiedade. “Nasaun ne’e ita hotu nian no sosa ho ema atus barak nia mate. Tanba ne’e, kakutak ne’e labele hanoin ba ukun de’it maibé tenke hanoin ba konstrusaun Estadu, kaer prinsípiu ka valór hosi beiala sira”, eis ativista rezisténsia iha diaspora ne’e hatutan.

Assanami hatutan tan PD prontu simu kalendáriu ne’ebé maka Prezidente Repúblika sei dekreta, tan ne’e nia husu ba sidadaun sira atu ezerse direitu votu iha eleisaun antesipada. “Ukun ne’e imi nian, tan ne’e fó fila fali ba imi atu deside”.

Nia esklarese PD sei utiliza programa Sétimu Governu Konstitusionál iha kampaña tanba programa ida ne’e povu nian ne’ebé tranforma ba Planu Estratéjiku Dezenvolvimentu Nasionál (PEDN) no nia autór prinsipál maka PD-CNRT.

“Ohin PD no FRETILIN  hatutan programa ida ne’e, ne’e duni, PD konsistente sei hato’o hikas ba povu iha kampaña”, esplika.

Jornalista: Xisto Freitas

Editora: Rita Almeida

HUSIK IDA HATÁN