APFTL Fó Formasaun LSBE ba Estudante Sekundária Sira

0
60
Estudante 30 husi Eskola Sekundária Téknika Vokasionál (ESTV) Cristal, Suai-Covalima, tuir formasaun. Foto: APFTL

DILI, (TATOLI) – Alumni Parlamentu Foinsa’e Timor-Leste (APFTL) fó formasaun LSBE (Life Skill Based Education) ba estudante eskola sekundária sira iha Timor-Leste.

“APFTL fó formasaun Life Skill Based Education (LSBE) ba estudante 30 husi Eskola Sekundária Téknika Vokasionál (ESTV) Kristal, Suai Kovalima. Formasaun ne’e hahú ohin, 22 to’o 23/02/2018”, divulga pájina ofisiál APFTL, ohin.

Formasaun ne’e organiza, iha munisípiu Bobonaro (Eskola Sekundária Dom Martinho da Costa Lopez), Kovalima (Eskola Sekundária Téknika Vokasionál (ESTV) Kristal, Suai-Kovalima) no Vikeke (Eskola Sekundária Jerál Katólika Santo Estevão, Vikeke).

Intensaun husi formasaun ne’e atu joven sira bele hatene no koñese ona sira-nia án no ema seluk.

Joven sira hatene ona no identifika rasik sira-nia abilidade bázika no joven sira bele hatene ona oinsá moris iha sosiedade.

Formasaun ba estudante sekundáriu sira ne’e, estudante sira sei aprende kona-ba abilidade hitu hanesan; hadomi ha’u án no ema seluk, hola desizaun no rezolve problema, domina emosaun, komunikasaun asertivu, interpesoal Skill (abilidade interpesoál) no empátia.

Antes ne’e, APFTL mós organiza atividade oi-oin ba kapasitasaun foinsa’e inklui sertame ba estudante sekundáriu sira iha fatin seluk nomós Dili laran. Iha kapitál Timor-Leste, eskola sira ne’ebé partisipa sertame mak hanesan eskola São Pedro, Sagrado Coração de Jesus (SACORJES), Eskola Sekundária 4 Setembru, Balide-Díli, Eskola Annur, Eskola Nobel da Paz nomós Eskola Tékniku Informátika (ETI).

“Hanesan mós joven, ne’e hanesan espasu ida atu sira mai espresa mós sira-nia matenek, sira-nia abilidade, sira bele hatudu saida mak sira hatene kona-ba istória Timor-Leste, konstituisan RDTL (Repúblika Demokrátika Timor-Leste) no edukasaun sívika”, informa prezidente APFTL, Zaulino Gomes da Silva ba ajénsia TATOLI iha Uma Biti Boot, SEJD, Lecidere.

Nia mós enkoraja ba foinsa’e no konkorente sira katak nu’udar ba joven sira buka espasu no oportunidade atu bele envolve no partisipa ho ideia, ho asaun atu depois bele dezenvolve án, dezenvolve kapasidade no abilidade atu nune’e bele prepara aan ba futuru.

Nune’e bele sai futuru inan-aman ne’ebé mak di’ak, sai lider ne’ebé mak di’ak hodi sai útil ba família no nasaun ida ne’e. Tanba ne’e tenke gasta tempu barak atu aprende no aprende nafatin. “Nu’udar joven, ikus liu ba joven sira hotu labele kaben sedu”, sujere Prezidente APFTL, Zaulino Gomes da Silva.

Jornalista: Rafy Belo

Editora: Rita Almeida

HUSIK IDA HATÁN