DILI (TATOLI)—Udan, anin boot ne’ebé mak akontese iha loro kraik, ohin, mais ou menus tuku 05 :30 oras Timor-Leste, obrigado estraga uma lima iha aldeia 12 de Outubru, suku Komoro, postu administrativu Dom Aleixo, Munisípiu Dili.
Vítima Adriano Caetano Guterres informa, ho akontesimentu ne’e, komunidade ne’ebé nia uma hetan estragu agora daudaun evakua ba família sira nia uma.
“Ami la bele toba iha ami nia uma. Ami muda ona sasán no haruka ona labarik sira ba toba iha família nia uma, tanba ami nia uma kakuluk laiha no uma laran bokon hotu,“ Adriano Caetano Guterres informa ba Tatoli iha fatin akontesimentu, foin lalais ne’e.
Tuir observasaun jornalista iha fatin akontesimentu uma lima ne’ebé hetan estragu agora daudaun la iha kondisaun atu bele hela. Sasán seluk ne’ebé mak estraga ho akontesimentu ne’e mak hanesan, sasán eletróniku inklui nesesidade seluk ne’ebé utiliza ba loron-loron nian.
To’o notísia ne’e hatún parte vítima seidauk hetan tulun ruma hosi parte kompetente.
(Jornalista: Agapito dos Santos)
(Editór : Manuel Pinto)
