Aniceto Neves Reprezenta UNTL Aprezenta ‘Memoria no Istória Pasada’ Iha Kambodia

0
117
International Educator Workshop, iha Kambodia. Foto: Dosente no Peskizadór, Aniceto Guro-Berteni Neves

DILI, (TATOLI) – Dosente no Peskizadór, Aniceto Guro-Berteni Neves, reprezenta Universidade Nasionál Timor Lorosa’e (UNTL), Fakuldade Siénsia Sosiál (FSS) halo aprezentasaun sientífika kona-ba “Chega! Academica_TL: Introdusaun ‘Memória no Istória Pasada’ iha Ensinu Fakuldade Siénsia Sosiais-UNTL”, iha Phnom Penh, Kambodia. Aprezentasaun ne’e hala’o hahú 15-19 janeiru 2018.

“Iha International Educator Workshop halo estudu, diskusaun, esplora no fahe esperiénsia husi nasaun Guatemala, Kambodia, Itália no Timor-Leste. Husi Timor-Leste, envolve Fakuldade Siénsia Sosiais-UNTL, UNPAZ, Asian Justice and Rights Indonesia ho Timor-Leste, ACBIT, no reprezentante husi Centro Nacional Chega (CNC) Timor-Leste”, informa dosente Departamentu Dezenvolvivemntu Komunitáriu ne’e ba TATOLI iha nia kna’ar fatin, FSS-Kaikoli, ohin.

Peskizadór Aniceto Guro-Berteni Neves haktuir, International Educator Workshop ne’e nu’udar kontinuasaun husi workshop dala-rua ne’ebé hala’o tiha ona iha tinan 2015 no 2016 iha Indonézia.

“Depois remata partisipa iha International Educator Workshop ne’e nia sita pontu rua importante”, dehan akademista ne’e.

Pontu rua ne’e mak, primeiru; lisaun aprendizajen ba Timor-Leste liuliu ba Fakuldade Siénsia Sosiais-UNTL nian mak: (a) Hakbiit ka hametin kapasidade dosente ka profesór sira iha FSS-UNTL halo peskiza kona-ba Memoria no Istória Pasada ne’ebé ho karáter atrosidade (Mass-Atrocities); (b) Hakbiit/hametin kapasidade dosente no profesór sira ba hanorin Memoria no Istória Pasada uza audio-vizuál, filme, testu istóriku, Istória-orál, no relatóriu sira ne’ebé relasiona ho Justisa Tranzisionál; (c) Dezenvolve metodolojia edukasaun replikavel, instrumentu sira no prátika iha Ensinu Aprendizajen iha Universitáriu; (d) Produz no halo publikasaun rezultadu sira.

Segundu; Fakuldade Siénsia Sosiais nesesariamente, hola asaun konkreta bazea ba proposta ne’ebé nia submete tiha ona mak: a) Estebelese Unidade Chega! Academica_tl iha Fakuldade Siénsia Sosiais-UNTL nian, hodi realiza atividade hirak hanesan; (i) hametin koordenasaun no servisu parseria ho CNC no Instituisaun Estadu nian relevante sira ba implementasaun rekomendasaun Chega!; (ii) halo estudu kona-ba métodu no tékniku peskiza nian (Istória-orál, audio-vizuál, filme, testu Istória, situs istóriku no testimonia iha maneira harii Instituisaun edukasionál, (iii) Instala biblioteka Chega! Academica_tl nian iha FSS.

Tuir mai, b) Dezeñu kuríkulu no silabus kona-ba hanorin Memoria no Istória Pasada nian, introduz rezultadu sira ba estudante, inklui organiza semináriu, workshop, focus group discussion hodi diskute no debate relatóriu ho rekomendasaun sira Chega! ho Komisaun Verdade no Amizade nian, inklui publikasaun sira seluk ne’ebé deskreve kona-ba atrosidade, Memória no Istória pasada-nian; Programa Chega! Academica_tl nu’udar insiativa ida atu reforsa papel Centro Nacional Chega! (CNC) nian hodi realiza rekomendasaun sira ne’ebé kabe ba setór Edukasaun nian.

Nune’e, Programa Chega! Academica_tl halo identifikasaun ba pontu rekomendasaun hirak hanesan tuir mai ne’e nu’udar alvu iha Fakuldade Siensia Sosiais-UNTL; Chega! Academic_TL operasionaliza ninia funsionamentu depois programa “International Educator Workshop” iha Phnom Penh, Kambodia.

Dosente Aniceto Guro-Berteni Neves esplika, Chega! Academic_TL nia objetivu mak atu introduz Rekomendasaun Chega! nian iha ensinu Superiór tuir rekomendasaun númeru 3.4 (Direitu ema idaidak nia seguransa: Commitment Nasionál atu labele halo violénsia) pontu 6 ne’ebé esklarese atu sistema edukasaun iha Timor-Leste, husi governu ka privadu, promove valór no dezenvolve kursu no métodu hanorin nian, atu fó sai abilidade no kultura ba dame, respeitu no la halo violénsia ba eskola oan sira, nune’e mós fó sai ba ema timoroan sira no figura importante sira seluk tan, ema ki’ik ka bo’ot sira ne’ebé hetan sira-nia objetivu, liuhusi dalan dame.

Depois, Rekomendasaun Chega! Pontu 3.6.1-4, hanesan tuir mai: 3.6.1, Implementa programa edukasaun sívika ne’ebé konpriensivu ne’ebé haree liuliu ba estrutura, instituisaun no demokrasia nia prosesu nune’e mós sidadaun nia direitu no obrigasaun; Programa ida ne’e tenke mós hanorin iha eskola sira.

3.6.2, Funsionáriu publiku hotu-hotu, hanesan polísia, militár, mestri, empregadu sira ne’ebé iha governu nia departamentu, simu bei-beik treinu, périodiku iha sira-nia servisu laran, no hetan evaluasaun kona-ba sira-nia funsaun hanesan funsionáriu governu no sidadaun Timor-Leste, atu nune’e sira garante katak sira halo sira-nia dever, ne’ebé politikamente imparsiál, étika, no hanesan profisionál.

3.6.3, Hili loron ida hanesan Loron Sidadania iha Timor-Leste atu nune’e hametin liu tan konsensializasaun ba sentidu no importánsia sidadania no hodi promove no selebra ita-nia valór demokrátiku no responsabilidade.

3.6.4, Tenke hanoin mós atu halo kondekorasaun anuál/tinan-tinan ba sidadaun timoroan sira ne’ebé halo kontribuisaun espesiál ba sira-nia komunidade rasik ka ba sira-nia nasaun no kontribuisaun hirak ne’e rekoñese hanesan modelu inisiativa no espiritu sidadania di’ak hodi nune’e ema seluk, liuliu klosan sira bele halo tuir.

Kontinua iha Rekomendasaun Chega! pontu númeru 3.7 kona-ba direitu ba edukasaun no auto-determinasaun kulturál, ho sub-pontu 3.7.1 – 7, mak hanesan tuir mai: 3.7.1, Timoroan nia kultura no tradisaun ne’ebé oras ne’e iha, buka atu dezenvolve atu nune’e sai identidade nasionál no harii nasaun, hanesan liuhusi sistema edukasaun, nune’e mós universidade no ajénsia ne’ebé relevante ba ida ne’e atu halo peskiza.

3.7.2, Sistema edukasaun Governu no Igreja nian halo kolaborasaun, atu dezenvolve kuríkulu no metodolojia hanorin nian ne’ebé bazea ba valór ho objetivu atu dezenvolve valór xave sira ne’ebé apropriadu ho tradisaun no situasaun Timor-Leste nian ohin loron, nomós promove kultura ida ne’ebé dame, la ho violénsia, no direitu umanu.

3.7.3, Sistema edukasaun Governu ho Igreja nian, kolabora atu dezenvolve kuríkuluu ba direitu humanu no metodologia hanorin nian hodi uza iha nível sistema edukasaun nian hotu, no nune’e, uza mós Relatóriu ida ne’e no materiál hirak ne’ebé iha relasaun atu nune’e garante katak kursu ne’ebé halo, bazea ba Timor- Leste nia esperiénsia.

3.7.4, Governu, ho hanoin nafatin ba inisiativa ne’ebé kreativu tebes ne’ebé hala’o tiha ona iha tinan 1974 to’o 1975, dezenvolve mós programa espesiál ida hodi haree mós ba eliminasaun analfabetizmu iha Timor-Leste, inkluindu ema adultu, nune’e més liliu ba feto, husi komunidade hirak ne’ebé izoladu.

3.7.5, Departamentu Edukasaun nian, mestre no akadémiku sira, uza rekursu multi- media ne’ebé harii tiha ona, no Komisaun mak tau hamutuk – durante ninia servisu ba rekonsiliasaun no investigasaun ba périodu 1974-1999 – nu’udar dalan atu halo riku liutan kontéudu kuríkulu edukasaun timoroan nian no atu tulun hanorin kona-ba istória, siénsia polítika, rezolusaun ba konflitu, relasaun internasionál no lei.

3.7.6, Governu estabelese programa repatriasaun ba arte hirak ne’ebé timoroan sira halo, dokumentu no materiál sira ne’ebé iha relasaun ho kultura, ne’ebé oras ne’e iha hela rai li’ur, no husu ba governu sira, instituisaun no individu sira ne’ebé sei rai hela sasan hirak ne’e iha sira-nia liman, atu fó fila fali mai Timor-Leste atu nune’e bele rai halo didi’ak, dezenvolvimentu no tulun esforsu atu habelar timoroan nia kultura tuir artigu 15 Kovenant Internasionál ba Direitu Ekonómiku Sosiál no Kulturál.

3.7.7, Governu estabelese programa atu hadi’ak fali no rai fatin ne’ebé metin no sasan hirak ne’ebé iha importánsia bo’ot ba kultura, ne’ebé aat ka estraga tiha ona durante tempu konflitu hanesan fatin Palacio das Cinzas iha Díli, hodi nune’e bele fó hanoin nafatin ba jerasaun futuru mai, kona-ba destruisaun iha tinan 1999, no dezafiu ne’ebé lideransa timoroan sira hasoru bainhira harii nasaun foun.

Iha área saúde no meiu-ambiente nian, iha Rekomendasaun Chega! númeru 3.8 afirma pontu situasaun hirak tuir mai atu bele hala’o tuir, liuliu iha rekomendasaun númeru 3.8.3 no 3.8.4 mak hanesan tuir mai: 3.8.3, atu tau ba dokumentu no halo evaluasaun ba efetividade ai-kulit ai-abut ka ai- tahan no medisina alternativu ka aimoruk ne’ebé uza iha ai-laran durante funu hodi halo rezisténsia, atu nune’e bele haree to’ok karik bele uza tan iha tempu oin mai.

3.8.4, Hala’o programa edukasaun públika ba tempu naruk liuhusi sistema edukasaun, atu nune’e hakle’an liutan komunidade nia matenek kona-ba relasaun meiu-ambiente fízika ne’ebé moos no saudável, liliu ba labarik sira.

Liga ba asuntu Feto nian, iha Rekomendasaun Chega! númeru 4, liuliu pontu 4.1.11, rekomenda atu hola medidas “ Governu hasa’e Eskritóriu kona-ba Promosaun Igualdade nian ba Sekretariadu Estadu nian iha Primeiru-Ministru nia eskritóriu no/ka fó ba iha Eskritóriu kona-ba Promosaun Igualdade nian ho Kuadru Konsellu nian ida hodi nune’e promove di’ak liutan no hasa’e igualidade jéneru nune’e mós feto nia partisipasaun kompletu iha Timor-Leste nia moris ekonómiku sosiál kulturál no polítika, inkluindu liuhusi promove hanorin hakerek, lee ba feto maluk sira iha área rurál, no hasa’e tan labarik feto no feto sira-nia partisipasaun iha eskola sekundária no universidade.

Iha parte labarik no Joven nian, Rekomendasaun Chega! liuliu hahú husi rekomendasaun númeru 4.2.1-8, atu: 4.2.1 Kontinua nafatin prosesu atu armoniza Timor-Leste nia lei ho Konvensaun Direitus ba Labarik (CRC), no fó kapasidade ida ne’ebé loloos ba instituisaun hirak ne’ebé responsabiliza atu implementa CRC no fó relatóriu ba ONU kona-ba oinsá Timor-Leste kumpri CRC, no atu promove ema nia hatene kona-ba CRC iha komunidade nia laran, liliu iha sistema edukasaun, imprensa no Igreja.

4.2.2, Halo kampaña edukasaun públika hanesan sira ne’ebé hala’o tiha ona kona-ba violénsia doméstika, hodi nune’e eduka inan-aman, mestri-mestra sira, komunidade, kona-ba violénsia nia efeitu fiziku no emosionál ba labarik, no fó forma alternativa kona-ba oin sa kontrola ema nia hahalok ka komportamentu, no dezenvolvimentu karáter nian.

4.2.3, Atu identifika no promove funsaun modelu pozitivu ba labarik mane no mane klosan sira, ba labarik feto no feto klosan sira.

4.2.4, Halo kolokasaun loloos ba rekursu, hodi nune’e dezenvolve infra-estrutura no jestaun desportu, atu nune’e ema nia abilidade ka kbiit ba desportu, bele kontribui ba relasaun komunidade, no ba dezenvolvimentu espirituál joven nian, inkluindu mós asesu hanesan ba labarik feto ki’ik-oan no feto klosan sira bele realiza.

4.2.5, Programa edukasaun ba saúde reprodutiva, sai nu’udar buat ida ne’ebé loloos, iha balansu no kumpriensivu, nune’e mós promove responsabilidade fó duni ba joven timoroan sira atu nune’e halo tuir duni Artigu 17 husi CRC, ne’ebé kaer metin ba direitu atu hatene, liliu informasaun hirak ne’e promove ba moris soin sosiál, espirituál, morál no fiziku no saúde mentál.

4.2.6, Atu foti duni medida, hodi nune’e bele garante katak Governu nia polítika kona-ba edukasaun universál, no atu nune’e bele hala’o duni iha prátika ba labarik hotu-hotu, liliu oan-ki’ak, sira ne’ebé alejadu, no sira ne’ebé hela iha komunidade rurál ne’ebé izoladu, inkluindu fó garantia katak labarik feto hotu-hotu iha asesu igualdade kompletu ba edukasaun no oportunidade atu sira bele hetan treinu vokasionál.

4.2.7, Labarik timoroan sira ne’ebé lori tiha ba Indonézia ne’ebé sei hela nafatin iha ne’ebá, dook husi sira-nia familia, atu fó oportunidade ba sira-nia família hodi halo kontaktu ka buka hasoru malu, nune’e mós fó opsaun ba sira ho livre vontade atu hili fila fali mai Timor-Leste, hodi nune’e tuir duni Artigu 9 no 10 husi CRC.

4.2.8, Fó konsiderasaun espesiál ba labarik timoroan nia situasaun, husi sira ne’ebé la hetan oportunidade atu hetan edukasaun ka labele hetan buat seluk tan, tanba de’it sira servisu ba klandestinu no sira sakrifika sira-nia juventude ba libertasaun Timor-Leste.

Entretantu, Dosente no Peskizadór, Aniceto Guro-Berteni Neves, reprezenta Universidade Nasionál Timor Lorosa’e (UNTL), Fakuldade Siénsia Sosiál (FSS) ba halo aprezentasaun sientífika iha Kambodia bazea ba despasu dekanu FSS-UNTL, iha inísiu dezembru 2017.

Jornalista: Rafy Belo

Editora: Rita Almeida

HUSIK IDA HATÁN